Blogger Tips and TricksLatest Tips And TricksBlogger Tricks

Pages

Wednesday 23 October 2019

మెరుపు చుక్క


మెరుపు చుక్క
వ్యధా భరితమైన

అశ్రువు ఒకటి నేలను జారింది
మౌనంగా రాలిపడిన పుష్పంలా...
నివురును వీడిన నిప్పురవ్వ ఏదో ఆర్తనాదం చేసింది
నింగీ నేలా ఏకమయ్యేలా...
తారాలోకం వీడి నేల వైపు
ఆర్తిగా రాలిన మెరుపు చుక్క
నా చెవిలో గుసగుసలాడింది
నువ్వు ఓడిపోయావని...
నేనేం చేయగలనింకా
మెరుపు రవ్వను ఒడిసిపట్టుకుని
పెదాలపై పులుముకున్నా
చెదరని నా చిరునవ్వులా..


Thursday 3 October 2019

మరమనిషిగా మార్చేయ్


మరమనిషిగా మార్చేయ్
నా దేహంలోని నరాలన్నీ లాగేసి
విద్యుత్ తీగలు అల్లేయ్
ఎముకలను తీసేసి ఇనుప రాడ్లు బిగించేయ్
గుండె గదిలో సర్వర్ రూమ్ పెట్టేయ్
మెదడును తీసేసి
మెమోరీ చిప్ అమర్చేయ్
చీకటిని చూడలేని నా కళ్ళను పీకేసి
హై పవర్ బల్బులు పెట్టేయ్
నాదేహంపై చర్మాన్ని వలిచేసి
ఇనుపకవచం తొడిగేయ్
రక్తమాంసాల ముద్దలు
మనుషుల లోకంలో ఇమడలేక పోతున్నా
దేవుడా నువ్వు నిజంగానే ఉంటే
నన్ను మరమనిషిగా మార్చేయ్..


దయ్యాలు


దయ్యాలు
దేవుడెలాగూ దొరికేలా లేడు
దయ్యాలను వెతకాలని అనుకున్నా
స్మశానాల్లో శోధించా
కీచరాళ్ల సవ్వడి తప్ప
పిశాచాల కీచుగొంతులు
వినిపించనే లేదు
ఊడలమర్రి కొమ్మలలో వెతికా
ఆకులు రాలుతున్నాయి తప్ప
దయ్యం ఆనవాళ్లే కానరాలేదు
ఊళ వేసే నక్కను అడిగా
గబ్బిలాల గుంపులో వెతికా
దయ్యలూ భూతాలు మాకు తెలియదని అన్నాయి
అలసిసొలసి నగరంలోకి నడిచా
వీధిదీపాల వెలుగుల్లో
చీకటిగదుల సరాగాలలో
విఫణి వీధుల్లో
మనసుల సంతలో
అనుబంధాల ముసుగులో
లక్షలాది దయ్యాలు హాహాకారాలు చేస్తూ కనిపించాయి
మనిషిలో దేవుడున్నాడో లేడో గానీ అణువణువునా దయ్యం ఉందని తెలుసుకున్నా
మరి నాలో దయ్యం దాగుందో...