Blogger Tips and TricksLatest Tips And TricksBlogger Tricks

Pages

Wednesday 30 December 2020

ప్రకృతివరం లక్నవరం..

 

ప్రకృతివరం లక్నవరం..







అక్కడ అడుగు పెట్టగానే ఏదో కొత్త లోకంలోకి వచ్చినట్టు ఉంటుంది.. నాలుగువైపులా ఎత్తన కొండలు... మధ్యలో నిండుకుండలా అందమైన సరస్సు... అక్కడక్కడా విసిరేసినట్లుగా కనిపించే అందమైన దీవులు.. పకృతి కాంత పచ్చ ముసుగు వేసుకుందా అనిపించేలా ఆకుపచ్చ అందాలు... ఉషస్సువేళ సరస్సును ముద్దాడే భానుడి వెండి కిరణాలు... వీనుల విందైన పక్షుల కువకువలు... ఎంత ముచ్చటైన భానోదయం... వరంగల్ కు సమీపంలో గోవిందరావుపేట మండలం పరిధిలో సుమారు పది ఎకరాల వైశాల్యంలో అందమైన పదమూడు దీవులతో ప్రకృతి కాంత సొగసులో మణి మకుటంలా విరాజిల్లుతున్న లక్నవరం సరస్సు అందచందాలు ఇవి...

అక్కడే ఉండిపోవాలనిపిస్తుంది

అవును అక్కడే ఉండిపోవాలని అనిపిస్తుంది. మొదటిసారి లక్నవరం నేను మా వాణితో కలిసివెళ్ళా.. అప్పుడు కాళేశ్వరం వెళ్లి తిరిగివస్తూ లక్నవరం వెళ్లాం.. నేనే కార్ డ్రైవ్ చేసి ఉండటం వల్ల ఆలసట అనిపించటం.. అప్పటికే సాయంత్రం కావడం వంటి కారణాలతో  అక్కడ ఎక్కువ సేపు ఉండలేదు. కానీ అక్కడ ఉన్నంతసేపు మేము ఏదో వేరే లోకంలో ఉన్నట్టు ఫీల్ అయ్యాం... కానీ సమయం అంతగా లేకపోవటం కారణంగా తొందరగానే తిరిగి వచ్చేసాం మళ్ళీ రావాలనే బలమైన కాంక్షతో... అనుకోకుండా పదిరోజుల వ్యవధిలోనే ఫ్రెండ్స్ తో కలిసి మళ్ళీ లక్నవరం చేరుకున్నా.. ఒకరోజు స్టే చేసాం అక్కడ.. ఇక్కడ ఉషోదయం ఒక అద్భుతం.. పర్యాటక శాఖ నిర్మించిన రోప్ వేలు ఇక్కడ ప్రధాన ఆకర్షణ.. నీటిలో విన్యాసాలు చేసే స్పీడ్ బోట్లు చూస్తూ ఉండిపోవాలనిపిస్తుంది. ఎంట్రెన్స్ లో మొదటి దీవిపై అందంగా నిర్మించిన హరిత కాటేజీల్లో బస చేయడం ఒక అందమైన అనుభవం.. అన్నింటికి మించి ప్రకృతి ఒడిలో సేద తీరాలనే మనసున్నవారికి ఇదో అందమైన అనుభవం.. హైదరాబాద్ నుంచి లక్నవరం కారులో వెళ్లాలంటే వరంగల్ లోకి ఎంటర్ కాకుండా నేరుగా ములుగు రోడ్డుపైనుంచి వెళ్ళవచ్చు.. మెయిన్ రోడ్డు పై చలవాయి ఏరియానుంచి రైట్ టర్న్ అయితే అక్కడికి చేరుకోవచ్చు. దాదాపు ఐదారు కిలోమీటర్లు మాత్రం గతుకులతో కూడిన ఘాట్ రోడ్డు ఉంటుంది. కానీ అక్కడ అడుగు పెట్టగానే అన్ని మర్చిపోతాం. అయితే స్టే చేయాలనుకుంటే మాత్రం ఆన్ లైన్ లోనే రూమ్ బుక్ చేసుకోవాలి. కాదనుకుంటే ఉదయం వెళ్లి సాయంత్రం దాకా హాయిగా ఎంజాయ్ చేయవచ్చు.. నేనైతే మళ్ళీ వెళతా ఖచ్చితంగా... ఎందుకంటే ప్రకృతి కాంత చేతులు చాచి మరలా మరలా రమ్మంటోంది మరి. నేను ప్రకృతి ప్రేమికుడినేగా

ప్రేయసిని చేరకుండా ఉండగలనా...

ఎందుకంటే అక్కడ చూడాల్సింది ఇంకా చాలానే ఉంది

Wednesday 23 December 2020

HAPPY BIRTHDAY MAMMA 🌹❤️🌹❤️🌹❤️🌹❤️🌹

HAPPY BIRTHDAY MAMMA

🌹❤🌹❤🌹❤🌹❤🌹



ఎంత ఎదిగిపోయావు మమ్మా...

చిట్టిపొట్టి అడుగులు

తడబడే నడకలు

ముద్దు ముద్దు మాటలు

ఇంకా మరిచిపోనే లేదు

ఇప్పుడు నా చాతీని తాకే  ఎత్తుకు ఎదిగిన నిన్ను చూస్తుంటే గుండె ఉప్పొంగిపోతోంది

మమ్మా చూడాలని ఉంది

నీ విజయశిఖరాలను

ఉంటానో లేదో తెలియదు

ఉన్నా లేకున్నా

ఉందో లేదో తెలియని

మరోలోకం నుంచి

నీ వైభవాలను చూస్తానేమో...

HAPPY BIRTHDAY MAMMA

🌹❤🌹❤🌹❤🌹❤🌹


Saturday 19 December 2020

ఐ డోంట్ కేర్

 

ఐ డోంట్ కేర్



ఐదు పదుల మైలురాళ్ళను ఆడుతూ పాడుతూ దాటలేదు నేను.

ఊహా తెలిసిన నాటి నుంచి ప్రతి క్షణం పోరాటంతోనే సాగింది.

ఎందుకంటే నేను గోల్డెన్ స్పూన్ తో పుట్టలేదు. తాత ముత్తాతల ఆస్తి పాస్తులు వారసత్వంగా రాలేదు. ప్రతిదినం వేదన, అవహేళన అవమానాలను దిగమింగుకుని పేదరికం స్థాయినుంచి మధ్యతరగతి స్థాయికి ఎగబాకాను. ఎవడిని ముంచకుండా ఎవడి మీద ఆధారపడకుండా ఒక వైభవంగా ఎదిగాను. ఎన్ని మలుపులు చూడలేదు ఎన్ని కుట్రలు అనుభవించలేదు అన్నీ జరిగాయి. మనుషుల్ని చూసాను మనుషుల మనసుల్ని చూసాను మనసుల మతలబులూ చదివాను. అన్నీ తట్టుకుని శిఖరమై నిలిచాను. నన్నెవరూ ఏమీ చేయలేకపోయారు. నా వైభవశిఖరాన్ని నేనే కుప్పకూల్చుకున్నా.. ఇప్పుడు కూడా అంతే నన్ను తొక్కేవాళ్ళు నన్ను నాశనం చేసేవాళ్ళు పుట్టలేదు. ఏం చేసుకోవాలన్నా నన్ను నేనే... ఇంతకన్నా ఏం జరుగుతుంది. జరిగితే జరగనీ.. ఇన్ని తట్టుకున్నోడిని ఈ జీవితం చేస్తున్న తాటాకు చప్పుళ్లకు బెదురుతానా!!!

ఐ డోంట్ కేర్..

Thursday 10 December 2020

నరకానికి సై...

 

నరకానికి సై...


నీకో  విషయం చెప్పనా

గమ్యమేమిటో నాకు అవసరం లేదు

మైలు రాళ్లు లెక్కించను

మలుపులు ఎన్నయినా పట్టించుకోను

నీ తీయని సాంగత్యంలో

జర్నీ చేస్తున్న విషయమే నాకు ముఖ్యం

చిరునవ్వుల వంతెనలు కడుతూ ఉండు చాలు

నీతో నరకానికైనా

నవ్వుతూ నడిచివస్తా...

Friday 4 December 2020

ప్రగతిభవన్ పై సర్జికల్ స్ట్రైక్

 

ప్రగతిభవన్ పై సర్జికల్ స్ట్రైక్


గ్రేటర్ ఫలితాలు నిస్సందేహంగా  సర్జికల్ స్ట్రైకే... కాకపొతే బండి సంజయ్ చెప్పినట్లు ఇది పాతబస్తీపై జరగలేదు. ప్రగతిభవన్ పై జరిగిన స్ట్రైక్ ఇది.. అయితే ఇంత జరిగినా తెరాస నేతల ఆలోచనల్లో మార్పు వచ్చినట్లు కానరావడం లేదు. ఓటమి విశ్లేషణలో మూసధోరణిలోనే మాట్లాడుతున్నారు. బిజెపి మతపరమైన భావోద్వేగాల ఆధారంగానే గెలిచిందని వాదిస్తున్నారు. కాదని నేను అంటాను. బిజెపికి మతం ఒక ప్లస్ పాయింట్ అయితే అయ్యి ఉండవచ్చు. అంతేగానీ అది ఒకటే కారణమని చెప్పడం సరికాదు. ఖచ్చితంగా తెరాస వైఫల్యాలే ఇందుకు కారణం. ఒకవేళ మతమే కారణం ఐతే బిజెపికి ఖచ్చితంగా వంద సీట్లు గెలిచి ఉండేది.అలా జరగలేదే. హిందూవులంతా మతావేశంతో ఊగిపోలేదే.. మతం బిజెపికి ఒక అదనపు బలంగానే ఉపయోగపడి ఉండవచ్చు. కానీ మతం పేరుమీదే గెలిచిందని అనలేము. ఎందుకంటే ప్రజలు ఎక్కడ నిర్లక్ష్యనికి గురయ్యారో బిజెపి అక్కడ మెరుగైన ఫలితాలు సాధించింది. ముఖ్యంగా వరద ముంపు ప్రభావిత ప్రాంతాల్లో బిజెపి దూసుకుపోయింది. దీనర్ధం ఏమిటి. అక్కడ ప్రభుత్వ వ్యతిరేకత ఉందనేగా.. గ్రేటర్ అంతటా బిజెపి గెలిచిందా లేదే.. కొన్ని చోట్ల గెలిచినా అది వన్ సైడ్ గా అంటే ఏకపక్ష మెజారిటీ సాధించలేదే. మతమే ప్రభావితం చేసి ఉంటే తెరాసకు ఇన్ని సీట్లు వచ్చి ఉండేవా.. ఇంకా ఈ మతం ముసుగుతో వైఫల్యాలను కప్పి పూచుకోవడం ఎందుకు. Trs ఒంటెద్దు పోకడలు, సర్వం మేమే అన్న అహంకారం, ప్రజాసమస్యలను సకాలంలో గుర్తించకుండా తెలంగాణా సెంటిమెంట్ నే నమ్ముకోవడం వంటి కారణాలతో ప్రజల్లో వ్యతిరేకత ఏర్పడింది. కాంగ్రెస్ ను నామరూపాల్లేకుండా చేయడం కూడా బీజేపీకి కలిసి వచ్చింది. ఖచ్చితంగా ఇది తెరాస  వైఫల్యమే. ఇవే్మీ ఆలోచించకుండా బీజేపీ మతం కార్డుతోనే గెలిచిందని ఇంకా వాదించడం తెరాసకే చెల్లింది. ఒకటి నిజం గ్రేటర్ ప్రజలు మొత్తంగా మతం వెంట పరుగులు తీయలేదు. మజ్లీస్ డివిజన్లకు ఆనుకుని ఉన్న ప్రాంతాల్లో కొంత ప్రభావం కనిపించిన మాట నిజమే. గత ఎన్నికల్లోనూ బిజెపి మతం అనే కార్డును ప్రయోగించింది మరి అప్పుడు ఎందుకు గెలవలేదు. ఎవరు ఎన్ని కార్డులు ప్రయోగించిన్నా గ్రేటర్ ప్రజలు ఎవరిని ఎక్కడ పెట్టాలో అక్కడే పెట్టారు. తెరాస నేతలు తమ ధోరణి మార్చుకోకపోతే భవిష్యత్తులో కాంగ్రెస్ పక్కన చేరినా ఆశ్చర్యం లేదు.

Tuesday 1 December 2020

ప్రజాస్వామ్యానికి మరణశాసనం

 

ప్రజాస్వామ్యానికి మరణశాసనం

నిజమే ఇది ప్రజాస్వామ్యానికి మరణశాసనమే...చార్మినార్ సాక్షిగా ఇక్కడి రాజకీయం ప్రజాస్వామ్యానికి మరణశాసనం రాసేసింది.. ఎన్నికల్లో మెజారిటీ సీట్లు సాధించిన వారే అధికారంలోకి వస్తారు. అయితే హైదరాబాద్ లో మెజారిటీ ప్రజలు పోలింగ్ ను తిరస్కరించారు. ఖచ్చితంగా ఇది తిరస్కరించడమే. నలభై శాతం ఓట్లతో గెలుపు ఓటములు డిసైడ్ అయ్యే పరిస్థితి ఏర్పడింది. అంటే  కొత్తగా వచ్చే పాలకపక్షాన్ని అరవైశాతం మంది ప్రజలు గుర్తించడం లేదనే కదా.. అసలు ఈ పరిస్థితి ఎందుకు ఏర్పడింది. ప్రజల్లో ఇంతగా నిరాసక్తత ఎందుకు ఏర్పడింది. గతంలో జరిగిన ఎన్నికల్లోనూ ప్రజలు పోలింగ్ కు దూరంగానే ఉన్నా ఈ సారి మాత్రం ఎన్నడూ లేనంత నిరాసక్తత ప్రజల్లో కనిపించింది. ఎందుకిలా జరిగింది అంటే ముందుగా ప్రభుత్వాన్ని ప్రశ్నించాల్సిన అవసరం ఉంది. డిసెంబర్ మొదటివారంలోనే ghmc కి ఎన్నికలు జరపాలనే రాజకీయ నిర్ణయాన్ని ప్రజలు తిరస్కరించారు.భారీ వర్షాలు వరదలతో నగరం అతలాకుతలమైన పరిస్థితిలో సడెన్ గా ఎన్నికలు వచ్చి పడ్డాయి. మరో రెండు నెలలు సమయమున్నా ఇంత అర్జంటుగా ఎన్నికలు జరపాల్సిన అవసరం ఏంటి?  దుబ్బాకలో బిజెపి కొట్టిన దెబ్బకు దిమ్మతిరిగిన trs నాయకత్వం bjp మరింతగా బలపడుతుందేమో అనుకుందా.. ఇంత అత్యవసర ఎన్నికలు ఎందుకు... ప్రతిపక్షాలను గుక్కతిప్పుకోనీయకుండా చేయాలని కాదా.. ప్రజలు మానసికంగా సిద్ధపడకముందే ఎన్నికలు జరిపేసారు. ఇదే కారణమేమో హైదరాబాదీ బయటికి రాలేదు. మరో విషయం ఏమిటంటే రాజకీయ పార్టీలు ప్రచారంలో ఊగిపోయాయి. హైదరాబాద్ పై సర్జికల్ స్ట్రైక్ చేస్తామనే దాకా వెళ్ళింది పరిస్థితి.ప్రజల్లో మతపరమైన భావోద్వేగాలు రగిల్చేందుకు ఎంత చేయాలో అంత చేశారు. అయితే ఇక్కడి ప్రజలు మతపరమైన అంశాలను చెత్తబుట్టలో పడేసారు. నిజంగానే మతపరమైన భావోద్వేగాలు ఏర్పడివుంటే ప్రజలు బారులుతీరి ఓటు వేసేవారు. మతకలహాలు జరుగుతాయని ప్రభుత్వం  ప్రచారం చేయడం వల్లనే ఓటింగ్ తగ్గిందని బండి సంజయ్ అంటున్నాడు పాపం ఆయనకు హైద్రాబాద్ గురించి అవగాహన లేదు. ఒకవైపు కత్తిపోట్లు జరుగుతున్నా తొంభై శాతం పోలింగ్ జరిగిన చరిత్ర హైదరాబాద్ కు ఉంది. ఎవడొస్తే ఏముంది అనే ఫీలింగ్ నగరవాసిలో బలపడింది. పోనీ ఓటు వేద్దామంటే ఓటర్ స్లిప్ ఉంటే లిస్టులో ఓటు ఉందో లేదో తెలియని పరిస్థితి. ఈ పాపంలో ఎన్నికల కమిషన్ భాగమే ఎక్కువ. ఇంటింటికి ఓటర్ స్లిప్ పంపిస్తామని చెప్పారు అది ప్రకటనకే పరిమితమయ్యింది. పోనీ ప్రభుత్వ వ్యతిరేకత ఉందా అంటే అదీ లేదు. ఒకవేళ  వ్యతిరేకత ఉంటే ఓటర్లు బారులు తీరి మరీ ఓటు వేసేవారు. వాడూ వీడూ అనికాదు మొత్తం రాజకీయులంటేనే హైదరాబాదీలకు ఏవగింపు వచ్చినట్టుంది. ఇక్కడి ప్రజలను నిందించి లాభం లేదు. బలవంతంగా ఎన్నికలు రుద్దటం,  మతాల పేరుతో నీఛ రాజకీయాలకు పాల్పడటం, ఎవడు ఎప్పుడు ఏ పార్టీ కండువా వేసుకుంటాడో తెలియకపోవటం... ఇలా ఎన్నో ఉన్నాయి కర్ణుడి చావుకు లక్ష కారణాలు ఉన్నట్టు.. మొత్తం మీద ఇక్కడ ప్రజలే గెలిచారు రాజకీయం ఓడింది. అయినా కొత్త పాలకవర్గం ఏర్పడుతుంది మెజారిటీ ప్రజల అభిమతాన్ని అపహాస్యం చేస్తూ... ప్రజాస్వామ్యమా ఇది నీకు మరణశాసనం కాదా...

Sunday 29 November 2020

ఇలాగైతే ఎట్టా...

 

ఇలాగైతే ఎట్టా...

 

అర్ధరాత్రి మెలకువ వచ్చింది.. ఏదో ఆలోచిస్తుంటే రెండు మంచి లైన్స్ మైండ్ లోకి వచ్చాయి.. నీ మొహానికి మంచి లైన్స్ కూడానా అని మొహం మీద అనేయకండి మనసు బాధపడుతుంది. సరే విషయానికి వస్తే మంచి లైన్స్ మైండ్ లోకి వచ్చాయిగా అదేనండీ నాకు మాత్రమే మంచి లైన్స్... పొద్దున్నే రాసుకుని పోస్టు చేద్దామని అనుకుని పడుకున్నా.. అదేంటో లేచాక ఒక్క లైనూ గుర్తుకువచ్చి చావటంలేదెందుకో.. ప్రతి రోజూ ఇదే తంతు. రోజూ నైట్ ఆలోచనలు వస్తాయి పొద్దున్నే మరిచిపోతా.. రాత్రే రాసి చావచ్చుగా అని అనుకుంటే బద్దకం.. ఏం చేయను అద్భుతమైన భావుకత (అదే నా దృష్టిలో) శూన్యంలో కలిసిపోతోంది. నా కష్టం పగవాళ్లకు మాత్రమే వస్తే బాగుండు...

పిచ్చోడే నయం

 

పిచ్చోడే నయం



దేవుడు నిజంగా ఉంటే

మరణించాక నన్ను

తన దర్బార్ లో నిలబెట్టి

ఏం కావాలో కోరుకో అంటూ వరం ప్రసాదిస్తే...

అప్పుడు నేను చిన్న దరఖాస్తు పెట్టుకుంటాను

నాకు మళ్ళీ మానవ జన్మ ఇస్తే

ఒక పిచ్చోడిలా పుట్టించు అని వేడుకుంటాను...

ఎందుకో తెలుసా

అప్పుడు లోకం చేసే గాయాలు నా మనసుకు తగలవు

అన్నింటికీ హాయిగా నవ్వుకోవచ్చు

చాటుగా కాకుండా

అందరిముందు గుండెలు పగిలేలా ఏడవవచ్చు

నాకోసం ఏడ్చేవారుండరు

ఎవరికోసమూ నేను ఏడ్చే అవసరమూ రాదు...

ఎందుకంటే ఈ లోకంలో

పిచ్చోడి జీవితమే ఎంతో నయం...

పాదాభివందనం

 

పాదాభివందనం

         


        

నన్ను జాగ్రత్తగా చూసుకుంటున్నామని      

అనుకుంటారు

అలా చూసుకునే క్రమంలో

నన్ను భరించడం అలవాటు చేసుకుంటున్నారని తెలుసుకోరు

నన్ను ఆకాశానికి ఎత్తుతున్నామని అనుకుంటారు

నా మనసు మాత్రం వారి పాదాలను ముద్దాడుతోందని గుర్తించరు

నన్ను ప్రేమించే మనసుకు

నిత్యం నా పాదాభివందనం 🙏

Wednesday 25 November 2020

తలరాత ( ఇది చదవకండి )

 

తలరాత

( ఇది చదవకండి )


అవును చదవకండి.. మనోభావాలు తోలూ తొక్కా దేవుడూ దెయ్యం వంటి ఫీలింగ్స్ తో సొంత వ్యక్తిత్వం లేకుండా పోయినవాళ్లు దయచేసి ఇది చదవకండి. తీవ్ర ప్రస్టేషన్ లో ఉన్నా నోడౌట్ ఫ్రస్టేషన్ లో ఉన్నప్పుడే సూటిగా మాట్లాడతా ఎవడి మనోభావాలు దేనిలో కలిసిపోయినా నాకు అనవసరం. అవగాహన ఉన్నోళ్లు చర్చించవచ్చు. మైండ్ తిక్క తిక్కగా ఉంటోంది తలరాత అన్న మాట వింటుంటే.. ఎవరిని కదిపినా ఎవరితో మాట్లాడినా ఏం చేస్తాం మన తలరాత అని నిట్టూర్చడం పరిపాటి. ఇందాక tv లో ఒక సీరియల్ కు సంబంధించిన యాడ్ లోనూ తలరాత అనే మాట వినిపించింది. పిచ్చి కోపం వచ్చింది ఆ మాట చెవిలో పడగానే.. అసలు ఈ తలరాత అంటే ఏంటి..? అందరూ తలరాత మీద భారం ఎందుకు వేస్తున్నారు.. మన మత సాంప్రదాయాల ప్రకారం విధిరాత ఎలా ఉంటే అలా జరుగుతుంది.. తకదీర్ మే జో లిఖా హై వహీ హోగా అని అంటారు.. శివుడి ఆజ్ఞ లేనిదే చీమైనా కుట్టదు అని అంటారు. మరి ఇలాంటప్పుడు చీమ తప్పేముంది అంతా దైవ లీల అని సరిపెట్టుకోవచ్చుగా.. జీవితంలో మనం మంచి కొంతే చేస్తాం. ప్రతి నిమిషం ఏదో ఒక చెడు చేస్తూనే ఉంటాం. అలాంటప్పుడు అక్కడ మన తప్పేముంది? మన నుదుటి రాత అమలవుతోంది అని అనుకోవచ్చుగా.. ఉదాహరణకు ఒక హత్య జరుగుతుంది. హంతకుడు దేవుడి ఆజ్ఞను నెరవేర్చాడని సన్మానాలు ఎందుకు చేయం.. చచ్చినోడు వాడి రాత ప్రకారమే పోయాడని అనుకోకుండా చంపినోడికి శిక్షలు ఎందుకు? ఒక అమ్మాయి పెళ్ళి కాగానే విధవగా మారిపోతుంది. విధిరాత ప్రకారం ఆ మొగుడుపోతే అదే విధిరాతను నుదుటన మోస్తూ దేవుడి ఆజ్ఞను భరిస్తున్న ఆ అమ్మాయి నష్ట జాతకురాలు ఎలా అవుతుంది.. దేవుడి ఆజ్ఞకు ప్రతినిధిగా ఉన్న ఆమెను పూజించాలి గాని నష్ట జాతకురాలంటూ దూరం పెట్టడం ఎందుకు. ఇది విధిరాతను ధిక్కరించటం కాదా ఇది దైవ నింద కాదా? నేను మంచోడినో చెడ్డోడినో నాకు తెలుసు. కొంతమందికి నా పనులు చెడ్డగా అనిపించవచ్చు. ద్రోహిగానో పాపిగానో మోసగాడిగానో కొందరికి అనిపించవచ్చు. అరే బై దీంట్లో నా తప్పేముంది తలరాత ప్రకారమే నేను చేస్తున్నా అనుకుని నన్ను గౌరవించవచ్చు కదా. మోసం ద్రోహం కుట్ర హత్య ఇలాంటి ఘోరాలు విధిరాత ప్రకారమే జరుగుతున్నప్పుడు దేవుడి ఆదేశాలను గుర్తించకుండా మంచోళ్ళు చెడ్డోళ్లు అంటూ భేదభావాలేందుకు? దేవుడు రాసిందే అమలవుతుంది ఏది జరిగినా దేవుడి ఆదేశమే అనేది నిజమే అయితే మరి పాపాలు చేయమని రాయడం ఎందుకు మళ్ళీ శిక్షలు ఎందుకు? ఇదంత దైవ లీల మంచి చెడు గుర్తించే మెదడు మనిషికి ఇచ్చాడు దేవుడు అని వాదిస్తారు కొందరు. అంటే దేవుడు ఏం రాశాడో పట్టించుకోకుండా మనిషి సొంతంగా ఆలోచించి చేయాలన్నమాట. అయితే ఇక్కడ తలరాత ఏమయినట్లు?

నిజానికి తలరాత దేవుడేమీ రాయడు. మన తలరాత మనమే రాసుకుంటున్నాం. ఎదుటివాడి తలరాతను మనమే మార్చేస్తున్నాం. ఒక మంచోడు కనిపించగానే నేను దొంగ దొంగ అని అరుస్తాను, నా చుట్టూ ఉన్న పదిమందిలో ఐదుగురు అది నమ్మినా ఆ మంచోడి తలరాతను నేను మార్చేసినట్టే. అలాగే నా రాతనూ మరొకరు మార్చేసేయొచ్చు. ఇక్కడ బలవంతుడు బలహీనుడి తలరాత మారుస్తాడు. ఒక్కోసారి బలహీనుడు దొరికిన అవకాశాన్ని సద్వినియోగం చేసుకుని బలవంతుడి తలరాతనూ మార్చిపడేస్తాడు. కుట్రలు కుతంత్రాలు చేసేవాళ్ళు ఎవరి తలరాతనైనా మార్చేస్తారు. అయితే అందరి తలరాతను మార్చగలిగే ఏకైక శక్తి డబ్బు మాత్రమే. ఇక్కడ మంచి చెడూ ఏదీ లేదు మారుతున్న తలరాతల్లో మంచోడు చెడ్డోడు కావచ్చు చెడ్డోడు మంచోడు కావచ్చు. మనం అన్నీ చేస్తూ విధి మీద నిందలేస్తాం. ఈ ప్రపంచంలో ఒకడి తలరాతను మరొకడు రాస్తూ బిజీగా ఉన్నంతకాలం ఉన్నాడో  లేడో తెలియని దేవుడి రాతలు నిందలు మోయాల్సిందే....

Sunday 22 November 2020

అమ్మ వచ్చింది...

 

అమ్మ వచ్చింది...


మెయిన్ గేటు దగ్గర ఏదో చప్పుడయింది.. గేటు తీసుకుని అమ్మ లోపలికి వస్తోంది.. కొంగులో ఏదో దాచుకుని వచ్చింది.. బెడ్ మీద నా పక్కనే కూర్చుని ఇవి తిను అంటూ నాలుగు యాపిల్స్, ఒక స్వీట్ బన్ చేతిలో పెట్టింది ఆప్యాయంగా.. ఎందుకో నా వైపు చూస్తూ తిట్లు మొదలు పెట్టింది... ఎలా తయ్యారయ్యావో చూడు కాళ్ళు చేతులు ఎంత  సన్నబడ్డాయి.. టైం కు తింటే ఏమయ్యింది... ఎప్పుడూ ఏదో ఆలోచిస్తూ ఉంటావు అంటూ క్లాస్ మొదలు పెట్టింది.. నేను యాపిల్ తింటూ అమ్మ క్లాసు వింటున్నా నవ్వుతూనే నాకిది అలవాటే గనుక.. అంతలోనే బుజ్జగింపు మొదలు పెట్టింది టైమ్ కు తినాలి బేటా అంటూ... సరే మమ్మా అంటూ క్రీమ్ బన్ తినేసా.. సరే నేను వెళ్తా అంటూ తన సంచీ తీసి వంద రూపాయల నోటు చేతిలో పెట్టింది.. ఎందుకమ్మా ఇది అని అడిగా.. అవి తెప్పించుకో.. అని మెల్లగా చెప్పింది.. అమ్మ అవి అన్నదంటే సిగరెట్లు అని అర్ధం.. డబ్బులు చేతిలో పెట్టి గేటువైపు కదిలింది.. ఎందుకో హఠాత్తుగా మెలకువ వచ్చింది.. ఇదంతా కలా.. అవును కలే.. ఈ లోకంలో లేని అమ్మ ఎలా వస్తుంది.. కళ్ళలో నీళ్లు సుడులు తిరిగాయి.. ఇదంత కలే అయినా మా అమ్మ బతికున్నప్పుడు  తరచుగా ఇలానే చేసేది.. సిగరెట్లు తాగొద్దని తిడుతూనే పైసలున్నాయో లేవో అనుకుని చేతిలో డబ్బులు పెట్టేది.. రాత్రి మూడ్ బాగాలేదు.. మూడ్ బాలేనప్పుడు ఎందుకో అమ్మ గుర్తుకు వస్తుంది.. అదే కారణమేమో రాత్రి అమ్మ కలలోకి వచ్చింది..

అప్పుడప్పుడు అనిపిస్తుంది అమ్మ నిజంగా తిరిగి వస్తే

అమ్మ పట్ల నేనేమన్నా తప్పుగా వ్యవహరించి ఉంటే కాళ్ళు పట్టుకుని క్షమాపణలు అడగాలని..

అమ్మ ఒడిలో తలపెట్టి మనసారా ఏడవాలని...

ఏదీ జరగదని తెలుసు

అమ్మ రాదనీ తెలుసు

అయినా మనసెందుకో

ఇప్పుడు అమ్మను బలంగా కోరుకుంటోంది. 😰

Saturday 21 November 2020

ఖల్ నాయక్

 

ఖల్ నాయక్



నాలా నేను జీవిస్తే ఎవరికీ నచ్చను

నాలా నేను లేకపోతే నాకు నేనే నచ్చను

నాకు నేను నచ్చాలా

ఈ లోకానికి నేను నచ్చాలా

ఏమో నాకే తెలియని

అయోమయంలో

ఎవరికీ నచ్చకుండా

నన్ను నేనూ మెచ్చని

ఒక ఖల్ నాయక్ లా 

మిగిలిపోతానేమో...

Thursday 19 November 2020

షరాబీ

 

షరాబీ



అప్పుడే చిగురించిన చందమామను చూసి

మబ్బులతో పయ్యెదలను

సవరించుకున్న ఆకాశంలా

మధుకలశాలుగా కైపును నింపుకున్న కన్నులపై

మత్తుగా వాలుతున్న రెప్పల్లా

లయతప్పిన శ్వాసలో వణికే తీయని అధరాల్లా

మృదు మంజీర సవ్వడిలో తడబడుతున్న పాదపద్మాల్లా

తనువంతా తమకంతో

ఒళ్ళు విరుచుకున్న రతీదేవిలా

నా అక్షరం గతి తప్పుతున్నది ఎందుకో

మధుశాలలో షరాబిలా..

Monday 16 November 2020

నా బాల్యం తిరిగివస్తోందా...?

 

నా బాల్యం తిరిగివస్తోందా...?


ఏమో అవుననే అనిపిస్తోంది... చిన్నప్పుడు నాన్నతో జ్ఞాపకాలు చాలా తక్కువే.. అప్పట్లో నాన్న ఇచ్చే పదిపైసలు ఎంతో అపురూపం.. నాన్న పదిపైసలు ఎప్పుడు ఇస్తారా అని ఎదురుచూసే వాడిని.. ఆ పదిపైసలతో నాకిష్టమైన చిరుతిళ్ళు కొనేవాడిని. నాన్న తొందరగానే వెళ్లిపోయారు. తర్వాత పెద్దన్నయ్య నెలకోసారి తెచ్చే ఖలాకంద్  స్వీట్ కోసం ఎదురుచూసే వాడిని.. ఇక దీపావళి వచ్చిందంటే చిన్నన్న తెచ్చే టపాసులకోసం వారం ముందు నుంచే ఎదురుచూడటం నాకలవాటు. ఎలాగైతేనేం చాలావరకు సరదాలు తీరకుండానే గడిచిపోయింది నా బాల్యం.ఇరుగుపొరుగు పిల్లల సరదాలను చూస్తూ మాకెందుకు లేదు ఇలాంటి జీవితమనుకుంటూ కష్టాలతో ఎదురీదుతూ బాల్యాన్ని దాటేసా.. తర్వాత జర్నలిజంలో స్థిరపడ్డాక నా పిల్లలకు అలాంటి పరిస్థితి ఎప్పుడూ రానీయలేదు. వాళ్ళు అడగకముందే అన్నీ కొనిచ్చా. ఆఫీసునుంచి వస్తున్నా అంటే  ఇంటికి ఏదో ఒకటి పట్టుకు రావడం అలవాటుగా మారిపోయింది. సరే ఇది చాలామంది చేసేదే ఇందులో నా గొప్ప ఏమీలేదని తెలుసు.. ఎందుకో ఇప్పుడు నా మానసిక పరిస్థితి మారిపోయింది.. అచ్చం చిన్న పిల్లాడిలా ఆలోచిస్తున్నా. ఆ మధ్య మా వాణీ బయటినుంచి వచ్చి నా పక్కన ఒక పార్సిల్ పెట్టింది. వావ్ నాకోసం kfc  చికెన్ తెచ్చింది అని సంబరపడ్డా. కాకపొతే అది ఫుడ్డు కాదు. మా వాణీ నాకోసం  తరచుగా kfc తెస్తుంటుంది కదా అందుకే అలా అనుకున్నానేమో అని నాకు నేను సర్ది చెప్పుకున్నా.. కానీ నిజం ఏమిటంటే నా మనసు చిన్నపిల్లాడిలా ఇలాంటివి కోరుకుంటోంది. అంతెందుకు వాణీ ప్రతిశుక్రవారం సాయంత్రం కూరగాయల మార్కెట్ కు వెళుతుంది. కూరగాయల మార్కెట్ కు వెళ్లిందా అంటే నాకు తినడానికి ఏదో తెస్తోంది అనుకుంటూ ఎదురుచూడటం అలవాటైపోయింది. నిజానికి ఈ నా మనస్సును నా వాణీ పసిగట్టిందేమో అలా వెళ్ళినప్పుడల్లా నేను చిన్నప్పుడు ఇష్టపడినవన్నీ నాకు తెచ్చిస్తోంది.  ఎందుకో నాకు తను ఆ సమయంలో అమ్మలా కనిపిస్తుంది. ఎంతో మురిపెంగా అవన్నీ దాచుకుని మరీ తింటుంటా.. ఎప్పుడైనా అలాంటివి తేకపోతే లోలోపల అలగటం కూడా మొదలయ్యింది. ఇక తాజాగా ఈరోజు ఆఫీసులో ఉన్న మా అబ్బాయికి ఫోన్ చేసి డాడీ  ఫిష్ తినాలనిపిస్తోంది అని అడిగేసాను. ఈమధ్య మా పాపతో మమ్మూ ఏమన్నా తినాలనిపిస్తోంది అని అడిగేస్తున్నా. తను బేకరీ నుంచి క్రీమ్ బన్ తెచ్చిస్తే అపురూపంగా తినేస్తున్నా.. ఇలా ఎందుకు బిహేవ్ చేస్తున్నానో నాకే తెలియటం లేదు కానీ చేస్తున్నా.. నా అదృష్టం బాగుండి మా అమ్మ తర్వాత అమ్మలా నా వాణీ నా బొజ్జ నింపడమే పనిగా పెట్టుకుంది. మా వాడైతే ఇంట్లో ఉన్నంత సేపు డాడీ ఏమన్నా తెప్పించనా అని పదే పదే అడుగుతుంటాడు. చిన్న దగ్గు వచ్చినా నా బంగారు తల్లీ కలవరపడుతోంది. విషయం ఏమిటంటే వీటన్నింటినీ నా మనసు ఎంజాయ్ చేస్తోంది. ఇది చిన్న పిల్లల మనస్తత్వం కాకపోతే ఏంటి..  ఇలా ఎందుకు జరుగుతోంది..ఆర్ధికంగా బలహీనుడిని కావడం వల్ల ఇలా ఆలోచిస్తున్నానా.. నా వాళ్ళే కదా నాకు చేయాల్సిందే అనే ఆలోచనా... ఎందుకిలా ఆలోచిస్తున్నా... నేను నావాళ్ళ అవసరాలు తీర్చాలి కానీ నా చిన్నచిన్న ఆశలకోసం మనసు ఎందుకు మారాం చేస్తోంది.  వృద్ధాప్యంలో బాల్యం వస్తుంది అని అంటారు. మరి నాకు యాభై ఏళ్ళేగా.. నా బాల్యం కోయిల ముందే కూస్తోందా..?

Sunday 15 November 2020

ఆడవే నయం

 

ఆడవే నయం



ఆటవిక జాతుల సంచారం

ఆదిమానవుల ఆచారం

ఇదే నేటి జనారణ్య గ్రహచారం

తమ సమూహమే గొప్పదంటూ

మరో సమూహాన్ని సంహరిస్తూ

తన వైభవానికి

మరొకడి జీవితాన్ని పునాదిగా మారుస్తూ

ఆటలాడుకుంటున్న ఆటవికుల ఆధునిక నగరం కంటే

అడవిజంతువులు సంచరించే కీకారణ్యమే ఎంతో కొంత నయం కదా...

Saturday 7 November 2020

జర జాగ్రత్త

 

జర జాగ్రత్త



ఎవరు చెప్పారు ఇది అందమైన లోకమని

నవవసంతాల నిలయమని...

ఎవరు చెప్పారు ఇది

సువిశాల భవన సముదాయ నగరమని...

అందం ఎప్పుడో వికారమైపోయింది

పూదోటల పరిమళాలు లేనే లేవు

కాగితం పూలపై అద్దిన అత్తరువాసనే గుభాళిస్తోంది...

విశాలమేదీ లేనేలేదు

ఇరుకు మనసున్న మనుషుల సంచారంతో

నగరీకరణ ఇరుకుగా మారిపోయింది...

ఇక్కడ అడుగు తీసి అడుగేయాలంటే జాగ్రత్త సుమా

జీవమున్న మృతకళేబరాలు ప్రతి మలుపులో ఎదురు చూస్తూనే ఉంటాయి...

జర సమల్కే చలో భాయ్

యే దునియా బడీ బే రెహమ్ హై...

Tuesday 3 November 2020

బాబోయ్ ఆడలేడీస్... 😳

 

బాబోయ్ ఆడలేడీస్...  😳



పేదలే.. జీవితంలో అన్నీ కష్టాలే.. కొడుకు టాక్సీ నడుపుతాడు.. అంతంతే ఆదాయం... కానీ ఉండేది మేడలో.. వేసుకునే బట్టలు  జిగేల్ మనేలా ఉంటాయి...

ఇంకోరకం ఫ్యామిలీ ఇంట్లోనే ఉంటారు అందరూ.. ఏవేవో డిస్కషన్స్ జరుగుతుంటాయి. బిజినెస్ లో సమస్యలు.. అయినా అక్కడ అవేవీ కనిపించవు అందరూ సూటు బూటులో ఆడోళ్లయితే ఖరీదైన చీరల్లో కిలోల కొద్ది నగలు దిగేసుకొని ఉంటారు..సేమ్ ఇలాంటిదే మరో ఫ్యామిలీ.. ఇక్కడ ఆడోళ్ళు  కుట్రలు కుతంత్రాల్లో మునిగి తేలుతూ ఉంటారు. నడి వయస్సు స్త్రీలు టన్నులకొద్దీ మేకప్.. కప్ప పెదవులవంటి పెదాలపై ఎర్రగా లిప్ స్టిక్ అప్పుడే రక్తం తాగిన పిశాచాల్లా.. కళ్ళకు భారీ లైనర్ తో దయ్యాల్లా కనిపిస్తారు. మొహాన్ని వికృతంగా మారుస్తూ చిత్రవిచిత్ర హావభావాలతో మాట్లాడుతూ భయం గొలిపేలా ఉంటారు.కొన్ని ఫ్యామిలీస్ లో అందమైన యువతులు ఉంటారు. కళ్ళను గిరగిరా తిప్పుతూ పెదాలను భయంకరంగా చూపుతూ మాటాల్లోనూ చూపుల్లోనూ రగిలిపోతుంటారు. సాటి ఆడది కన్నీళ్లు పెడుతున్నా కుట్రలు కుతంత్రాలు చేస్తూ మానసికంగా శారీరకంగా హింసిస్తూ ఉంటారు. వీరిని చూస్తుంటే వామ్మో ఆడలేడీస్ ఇంత డేంజరా అని భయం వేస్తుంది. ఇంతకీ ఇలాంటి ఫ్యామిలీస్ ఉన్నాయా అంటే.. ఎందుకు లేవు మన తెలుగు టివి సీరియల్స్ నిండా ఇవేకదా.. టీవిలో సినిమా మధ్యన బ్రేక్ లో వచ్చే ఈ సీరియల్స్ టీజర్లు చూస్తేనే ఇంతగా భయం వేస్తోంది అంటే రోజూ గంటల తరబడి చూసే ఆడవాళ్ళ గుండె ధైర్యానికి జోహార్లు చెప్పాల్సిందే..

Monday 2 November 2020

ఎలా చెప్పను

 

ఎలా చెప్పను



మాటల్లో చెప్పమంటే

ఎలా చెప్పను

ఏమని చెప్పను

కొన్ని అనుభవాలకు

మాటలు ఉండవు

కొన్ని అనుభూతులకు

అక్షరాలు ఉండవు

అక్షరాల్లో రాయలేనిది

నా కన్నుల్లో చదివే ఉంటావుగా

మాటల్లో చెప్పలేనిది

నా చిరుస్పర్శ సవ్వడిలో

వినే ఉంటావుగా

మనస్వినీ...

Saturday 31 October 2020

నాలోని మరో మనిషి

 

నాలోని మరో మనిషి



వృత్తి ప్రవృత్తిల మధ్య సఖ్యత కుదరలేదేమో నేనిలా కూడలిలో బొమ్మలా మారిపోయాను...

వృత్తిపరంగా అత్యంత కాఠిన్యమే నాది. ఎవరినీ నమ్మను. ప్రతిదీ అనుమానమే నాకు... కరుడుగట్టిన నేరస్థులు పోలీసు అధికారుల సాన్నిహిత్యంతో బండబారిన మనిషిలా ప్రవర్తించాను. ఏదైనా క్రైమ్ వార్త ఉంటే అది నేరం చేసినవారి కోణంలో ఆలోచించడం అలవాటైపోయింది. ప్రతిదీ నెగిటివ్ గా ఆలోచించడం, బాధితులు అనబడేవారు నేరం చేసి ఉండవచ్చు కదా అనే దృక్పథంలో  రాటుదేలిపోయాను. ఈ పంథా వృత్తిలో నా ఇమేజ్ ని బాగా పెంచేసింది.. అయితే ఇది కాసేపే.. కొంచెం సమయం చిక్కితే నాలోని మరో మనిషి రెక్కలు విప్పుకునేవాడు.. అదే నా ప్రవృత్తి.. ఆకాశంలోని మబ్బుల్లో ఆకృతులను వెతుక్కోవడం.. చల్లని చందమామ నీడలో అక్షరాలను అల్లుకోవడం.. కాగితంపై రాసుకున్న భావుకతను చూసుకుని మురిసిపోవడం నా ప్రవృత్తిగా మారిపోయింది. ఒంటరిగా ఉన్నా పదిమందిలో ఉన్నా మనసులో జనించే భావాలను నాకు నేను చెప్పుకుంటూ అందరిలో ఉన్నా ఒంటరిగా మిగిలిపోయాను. వృత్తిలో ఉన్న కాఠిన్యం ప్రవృత్తిలో సున్నితమైపోయింది. ప్రతిదీ నమ్మేసాను.ఓహో అలా జరుగుతుందా జరుగుతుందిలే ఎందుకు జరగదు జరిగి తీరుతుంది అనే నమ్మకం గుండెలో పేరుకుపోయింది.... తీయగా పలకరించిన అందరినీ నా వాళ్ళే అనుకుని మురిసిపోయాను. ప్రతిక్షణం భావప్రపంచంలో చిన్న పిల్లాడిలా ఆడుకున్నాను. ఇక్కడే వృత్తి ప్రవృత్తిల మధ్య వైరుధ్యం పెరిగిపోయిందేమో.. ఇప్పుడు వృత్తి వెనుకబడిపోయింది ప్రవృత్తి పైచేయి సాధించింది. వృత్తి అన్నం పెడితే ప్రవృత్తి దారిద్ర్యాన్ని రుచి చూపింది. వృత్తిలో నా అక్షరాలు తూటాలుగా దూసుకుపోతే ప్రవృత్తిలో నా అక్షరాలు నాగుండెనే ఛిద్రం చేస్తున్నాయి. అవే అక్షరాలు లేపనం పూస్తున్నాయి... నవ్విస్తున్నాయి కవ్విస్తున్నాయి గుండెనిండా ఏడిపిస్తున్నాయి.. ఆ అక్షరాలు గొప్పవా ఈ అక్షరాలు గొప్పవా తెలియని సందిగ్ధత గందరగోళం రేపుతోంది. ఒకటి మాత్రం నిజం వృత్తి ప్రవృత్తిల రాపిడిలో నేను ఒక అగ్నిశిఖలా మారిపోయాను

Tuesday 27 October 2020

మరణమే ఓటమి

 

మరణమే ఓటమి


నా హృదిలో స్పందనలు కొనసాగినంత కాలం

నా గొంతులో శ్వాస ఉన్నంత కాలం

ప్రతి క్షణాన్ని

వెంటాడుతూ

వేటాడుతూనే ఉంటా

విజయశిఖరాన్ని ముద్దాడాలని

నాకు తెలుసు

మరణం మాత్రమే

నాకు ఓటమి...

Wednesday 21 October 2020

నాకు నేనే ప్రత్యేకం

 

నాకు నేనే ప్రత్యేకం



నాతో నేను గడిపే ప్రతి క్షణం నాకెంతో అమూల్యం

నాతో నేను చెప్పుకునే మాట నాకో సందేశం

నాపై నేను వేసుకునే ప్రశ్న

నాకెప్పటికీ ఒక గుణపాఠం

నా పెదాలపై విరిసే చిరునవ్వు

అది అంతులేని రహస్యం

నా కనుల జారే జలపాతం

నాకు ఎప్పటికీ స్వయంకృతాపరాధం

అందుకే నేను ఎందరిలో ఉన్నా నాతో నేను ఉండాలనే ప్రయత్నిస్తా

ఎందుకంటే

నాకు నేను ఏంతో ప్రత్యేకం...

Tuesday 20 October 2020

మళ్ళీ మళ్ళీ మరణించాలని

 

మళ్ళీ మళ్ళీ మరణించాలని



ప్రతి రాత్రి నిద్రపోయే ముందు అనుకుంటా

ఈ రాత్రే చివరి రాత్రి అవుతుందేమోనని...

రాత్రికి మరణిస్తూ

ప్రతి ఉదయం పుడుతూనే ఉన్నా

మళ్ళీ మళ్ళీ మరణించాలని...

Monday 19 October 2020

కేసీఆర్ దే తప్పేమో...

 

కేసీఆర్ దే  తప్పేమో...


ఎవరో ఆవారాగాళ్ళు అంటున్నారంటే ఏమో అనుకోవచ్చు. కానీ ఇక్కడ తిండి తిని ఇక్కడే బతుకుతూ ఇక్కడి విపత్తుపై కుళ్ళు కామెంట్లు చేస్తున్న కొందరు ఆంధ్రా  ప్రముఖులను చూస్తుంటే ఒళ్ళు మండిపోతోంది.. వాడెవడో బ్రహ్మాజీ అంట బతికేది ఇక్కడే, సంపాదనా ఇక్కడే.. హైద్రాబాద్ మునిగిపోతే కుళ్ళు జోకులేస్తున్నాడు.. తనవంతు బాధ్యతగా చేయూతనివ్వాల్సింది పోయి పడవ కొంటా అంటాడు. అంత  బలుపు ఉంటే ఓ నాలుగు పడవలు కొని హైదరాబాద్ పోలీసులకు ఇవ్వొచ్చుగా.. ఇంకోడేమో కేసీఆర్ వల్లే నగరం మునిగింది అంటున్నాడు.. ఓ గాలి మనిషేమో హైదరాబాద్ ఇప్పుడు సేఫ్ కాదని అంటున్నాడు. ప్రతి అడ్డమైనోడు హైద్రాబాద్ దుస్థితిపై మానసిక వికారం బయటపెట్టుకుంటున్నాడు...మళ్ళీ మళ్ళీ చెబుతున్నా  హైద్రాబాద్ ఈ దుస్థితికి చేరుకోడానికి ఆంధ్రా పాలకులే కారణం. అసలు 1990 ప్రారంభం నుండే నగరంలో ఆక్రమణలు ఊపందుకున్నాయి. ఓ నేదురుమల్లి, ఓ కోట్ల ఒక ఎన్ టీ ఆర్, ఓ వైయస్సార్, ఒక చంద్రబాబు... వీళ్ళ హయాంలోనే ఎక్కువగా నాలాలు, చెరువులు కబ్జాకు గురయ్యాయి. అక్రమాలపై ఏ ప్రభుత్వమూ స్పందించలేదు. పైగా రిజిస్ట్రేషన్లు కూడా చేసి ఇచ్చారు. మరి ఈ టైం లో ఘనత వహించిన మజ్లిస్ పార్టీ ఏం చేసిందబ్బా అని అడగొచ్చు... చాలా చేసింది ఏ పార్టీ అధికారంలో ఉంటే ఆ పార్టీ పంచన చేరింది ఇప్పటిలాగానే.. మరి కేసీఆర్ కూడా అప్పట్లో ప్రభుత్వంలో భాగంగా ఉన్నాడు కదా అంటే నిజమే.. ఏమన్నా చేసే బలం ఉందా అప్పుడు కేసీఆర్ కి.. సరే తెలంగాణా  వచ్చాక ఏమన్నా మారిందా అంటే లేదు.. అప్పటికే జరగాల్సిన నష్టం జరిగిపోయింది.. ఆక్రమణలను తొలగించటం ఎవరికీ సాధ్యం కాని పరిస్థితికి చేరుకుంది నగరం.. ఇప్పుడు ఆంధ్రా మేధావులు చేస్తున్న కామెంట్లను చూస్తుంటే కేసీఆర్ ఒక తప్పు చేసాడని ఒప్పుకోక తప్పదు. తెలంగాణా ఉద్యమసమయంలో కేసీఆర్ తెలుగు సినిమా ఇండస్ట్రీ, ఆంధ్ర వ్యాపారులు, పారిశ్రామిక వేత్తలు, ఆ ప్రాంతానికి చెందిన నాయకులపై తరచుగా విరుచుకుపడేవారు. తెలంగాణా వస్తే ఏదో ఉపద్రవం తప్పదని ఈ వర్గాలు భయాందోళనలకు గురయ్యాయి. కానీ అధికారంలోకి రాగానే కేసీఆర్ వీరందరికి పెద్ద పీట వేశారు. సినిమా రంగానికి పెద్దన్నగా ఉంటాననని హామీ ఇచ్చారు. ఇదే ఆయన తప్పేమో.. తెలంగాణా వ్యతిరేకులపై ఆయన కక్ష సాధించలేదు. అదే చేసి ఉండాల్సిందేమో.నగరం చుట్టూ అనేక పరివాహక ప్రాంతాలు, చెరువులను ఎంతమంది ఆంధ్రా పెద్దలు ఆక్రమించలేదు. సాక్షాత్తు ఆంధ్ర ముఖ్యమంత్రి ఫామ్  హౌస్ కట్టుకున్న విషయం మరిచిపోవద్దు. సినిమా ప్రముఖులు చెరువులను కబ్జా చేసిన ఉదంతాలు కాదనలేనివా.. కేసీఆర్ వీరిపై ఎలాంటి చర్యలు తీసుకోకపోవటం తప్పే.. అనేకమంది ఆంధ్రా ప్రముఖులు ఇక్కడ కబ్జాదారులు... వీరినీ  కేసీఆర్ టచ్ చేయలేదు ఇదీ తప్పే... చెరువుల్లో వెలసిన కట్టడాల్లో వందలాది నిర్మాణాలు ఆంధ్రా వాళ్ళవే.. వీటిని కూడా కేసీఆర్ కదపలేదు అబ్బా కేసీఆర్ ఎన్ని తప్పులు చేసాడు. అందుకే నగరం మునిగిపోవడానికి కేసీఆర్ కారణమయ్యాడు.

అందుకేనేమో హైద్రాబాద్ మునిగిపోతే వికారమైన కామెంట్లు పెడుతున్నారు.

నిజానికి ఇప్పుడు ఇక్కడ ఆంధ్రా ముఖ్యమంత్రి ఉన్నా ఇదే పరిస్థితి ఉండేది. వంద ఏళ్లలో ఎప్పుడూ లేనంత వర్షం కురిస్తే ఎవరు మాత్రం ఏం చేయగలరు. ఇవన్నీ తెలిసికూడా పిచ్చికూతలు కూస్తున్న ఆంధ్రా ప్రముఖులు కొందరు ఇప్పటికైనా కళ్ళు తెరిచి తమ సొంత ప్రాంతాలకు వెళ్లిపోవడం బెటరేమో.. ఇక్కడ సామాన్యులైన ఆంధ్ర సోదరులు ఆనందంగానే ఉన్నారు. అందరం మునుగుతున్నాం అందరం తేలుతున్నాం.సాధ్యమైతే చేయూతనివ్వండి.. బాధితులకు అండగా నిలవండి. లేకపోతే నోర్మూసుకుని కూర్చోండి.  గుట్టల మీద బంగ్లాల్లో కూర్చుని కామెంట్లు చేస్తున్న వెధవలు యస్ వెధవలు అనే పదాన్నే వాడుతున్నా సొంతూరికి షిఫ్ట్  అవ్వడం మంచిది.

వాళ్ళ సినిమాలు, వాళ్ళ వ్యాపారాలు ఇక్కడ లేకపోతే మాకు వచ్చే నష్టం ఏమీ లేదు..

Sunday 18 October 2020

వేట

 

వేట


జీవితమంటే ఆట కానే కాదు

ఇది ముమ్మాటికీ ఒక వేట

ఆటలాడకు ఇక్కడ

వేటాడుతూ ఉండు

వేట ఆపేసావో

జీవితం నిన్నే వేటాడేస్తుంది

Saturday 17 October 2020

నీ పూజకు కుసుమాలు

 

నీ పూజకు కుసుమాలు



నా భావాలకు బొమ్మలు వేయలేను

ఎందుకంటే నేను చిత్రకారుడిని కాను...

తెలుగు అక్షరమాల ఉంది కాబట్టి సరిపోయింది

నా మనసుకు అక్షరరూపం ఇవ్వగలుగుతున్నా...

గుండె గుడిలో కొలువైన నీ ఆరాధనకు ఒక్కో అక్షరాన్ని పువ్వులుగా మలుచుకుంటున్నా...

నా అక్షరాలను పూదండలా  కూర్చి నీ మేడలో మాలలా అలంకరిస్తూ నీపై నాకున్న ఆర్తిని చాటుకుంటున్నా...

మనసులో వేదన జనిస్తే

అక్షర పుష్పాలను కన్నీటితో తడిపి నీ పాదపద్మములను అభిషేకిస్తున్నా...

నా అక్షరాలు ఎవరికి ఎలా కనిపించినా అవి మాత్రం నీ పూజకు విరిసిన కుసుమాలే...

అక్షరాలున్నాయి గనుక సరిపోయింది

అవే లేకపోతే నా భావాలను అదుపుచేయలేక గుండె పగిలి చచ్చిపోయేవాడినేమో

మనస్వినీ...