పదిలం సుమా

 

పదిలం సుమా

కొంచెం కష్టమే సుమా

మనసులో మమతలు ఏ మూలనైనా ఇంకా మిగిలే ఉంటే

కాలం గీసిన చిత్రంలో నువ్వూ నేనూ విరబూసిన నవ్వులు ముల్లులా గుచ్చుకుంటూనే ఉంటాయి...

కొంచెం భారంగానే ఉంటుంది

జ్ఞాపకం ఏదైనా మిగిలి ఉంటే

నువ్వూ నేను నడిచిన బాటకు అలవాటు పడిన పాదాలు నీ కొత్త పయనంలో కాస్త తడబడుతూనే ఉంటాయి...

కొంచెం కలవరం ఉంటుంది

వాస్తవాలు చెప్పుకోవాలంటే

అంతరాత్మ మనసు పొరల్లో మౌనంగా రోదిస్తూనే ఉంటుంది...

జాగ్రత్త సుమా

పరిస్థితులను విస్మరించే గుణమున్న నా మనసు ఇంకా నీ పదిలమే కోరుతోంది...