చావు భయం...

చావు భయం...

ఆంక్షలు ఇంకా కొనసాగించాలని కోరుతున్నావు నువ్వు
సడలిస్తేనే బతుకని అంటున్నాను నేను...
పచ్చనోట్ల కట్టలపై నిదురిస్తున్నావు నువ్వు
కాలే డొక్కల చప్పుళ్లలో
నిద్రలేని రాత్రులు నాకు...
బయటికి ఎళ్ళకున్నా
అన్నీ అందుబాటులోనే నీకు
అడుగుతీసి అడుగు వెయ్యకపోతే పైసా పుట్టదు నాకు...
ఇంటినుంచి పనంటూ జీతం తీసుకుంటావు నువ్వు
పనిచ్చేటోడు లేక బిక్కు బిక్కు మంటున్నా నేను...
పలకరిస్తే అందరూ ఆదరిస్తారు నిన్నూ
ఎక్కడ అప్పులు అడుగుతానో అని తప్పించుకుంటారు నన్ను...
ప్యాకేజీలు ఫార్ములాలు నిలబెడతాయి నిన్ను
ఎవరికీ కానరాక కూలిపోతున్నా నేను...
ఆంక్షలు సడలిస్తే దూసుకుపోతావు నువ్వు
కాలిబాటన గమ్యంలేని దూరాలకు పయనిస్తా నేను...
అయినా మనిద్దరి భయం ఒకటే...
ఆంక్షలు సడలిస్తే కరోనా చంపేస్తదని భయం నీకు
సడలించకపోతే ఆకలి చంపేస్తదని భయం నాకు...
సగటు జీవిని నేనైనా
బడాబాబువి నువ్వైనా
మనిద్దరికీ చావు భయం పట్టుకుంది ఇదే నిజం...