గుండెల నిండా తెలంగాణా..(PART-25)

గుండెల నిండా తెలంగాణా..(PART-25)

నా జర్నలిజం ప్రస్థానంలో తెలంగాణా ఉద్యమం ఒక సువర్ణాధ్యాయం అని చెప్పవచ్చు.. ఎన్నో ప్రజా ఉద్యమాలు చూసాను సంచలన వార్తలు కవర్ చేసాను కానీ తెలంగాణా ఉద్యమంలో ఎదుర్కొన్నంత ఉద్విగ్నత ఎప్పుడూ ఎదురుకాలేదు.. ముఖ్యంగా నేను జీ ఇరవైనాలుగు గంటలు ఛానల్ లో పని చేసిన సమయం ఒక అపూర్వ ఘట్టంలో భాగం కావడాన్ని గర్వించదగ్గ అంశంగానే భావిస్తున్నా..

కేసీఆర్ నాయకత్వంలో తెలంగాణా ఉద్యమం ఒక సునామీలా దూసుకుపోతున్న సమయం.. తెలంగాణలో ప్రతి గుండె ఉద్యమం కోసం స్పందిస్తున్న సమయం ఎక్కడ చూసినా గులాబీ జెండాల రెపరెపలు జై తెలంగాణా నినాదాలు... ఈ ఉద్యమాన్ని సాధ్యమైనంత తక్కువ చేసి చూపడానికి ఆంధ్రా మీడియా నానా తంటాలు పడుతున్న సమయం.. ఆ కీలక సమయంలో తెలంగాణా గుండె చప్పుడు వినిపించింది జీ ఇరవైనాలుగు గంటలు. మా ఛానల్ హెడ్ శైలేష్ రెడ్డి తో బాటు లీడింగ్ రోల్ లో ఉన్న మేమంతా తెలంగాణా వాదులమే.. అయినా మేమెక్కడా అతి చేయలేదు, లేని ఉద్యమాన్ని ఉన్నదన్నట్లు అబద్ధాలు ప్రసారం చేయలేదు. జరుగుతున్న పరిణామాలకు అద్దం పట్టాం.. ఉన్నది ఉన్నట్టే చూపించాం.. మా బాస్ శైలేష్ నాయకత్వంలో ఎవరికీ వీలైనంత వాళ్ళు ఉద్యమానికి బాసటగా నిలిచాం. ఇక్కడ ముఖ్యంగా కొంతమంది కొలీగ్స్ గురించి చెప్పుకోవాలి.

Chengalwa Sridharrao

గురించి ప్రధానంగా.. తెలంగాణా ఉద్యమ తీరు తెన్నులను దగ్గరగా గమనిస్తూ శ్రీధర్ చేసిన విశ్లేషణాత్మక కథనాలు ఎంతో ఆసక్తిగా ఆలోచింప చేసేవిగా ఉండేవి.. శ్రీధర్ స్టోరీలకు అప్పట్లో నేను ఫ్యాన్ నే... ఇక మా

Thammanaboina Vasu

Narra Vijay Kumar

లయితే చిచ్చర పిడిగులే.. ఒక దశలో ఉద్యమ నాయకుల్లా కనిపించేవారు.. ఆ టైం లో క్రైమ్ బ్యూరో చీఫ్ గా నేను నా వంతు పాత్ర పోషించాను. జెండాలు పట్టలేదు, నినాదాలు చేయలేదు గానీ నా స్ట్రింగర్స్ టీమ్ ను ఉద్యమానికి అంకితం ఇచ్చేసాను. ఏ గల్లీలో ఏం జరిగినా మా లోకల్ రిపోర్టర్స్ వెంటనే విజువల్స్ పంపేవారు, అవి వెంటనే టెలికాస్ట్ అయ్యేలా చూసే వాడిని. సాయంత్రం ఏడుగంటలకు నాది హైదరాబాద్ బులెటిన్ ఉండేది.. ఆ బులెటిన్ నిండా ఉద్యమవార్తలే..

ఈ బులెటిన్ లో నేను రాసిన ఉస్మానియా తల్లి కన్నీరు పెడుతోంది అనే స్టోరీ ఒక సంచలనమే రేపింది.ఒకవైపు శ్రీధర్ విశ్లేషణలు, వాసు విజయ్ ల స్పెషల్ స్టోరీలు, నా టీమ్ తెచ్చే ఎక్స్ క్లూజివ్ విజువల్స్, దానికి మా డెస్క్ దిద్దే మెరుగులు.. ఛానల్ అంతా తెలంగాణా మయంలా కనిపించేది.డెస్క్ లో GOPALA

Ramesh Gopala

Rajamouli Chary

లు తెలంగాణా వాదులే.. మిగతా ఛానల్స్ తప్పదన్నట్టుగా మొక్కుబడి వార్తలు వేసేవారు.అయితే ఈ వ్యవహారం మాకు కొంత ఇబ్బంది కలిగించిన మాట వాస్తవం. ముఖ్యంగా శైలేష్ పై తీవ్ర ఒత్తిడి ఉండేది. కాంగ్రెస్, టిడిపి నేతలు సుభాష్ చంద్ర లెవెల్ లో లాబీయింగ్ చేసి శైలేష్ పై ఒత్తిడి తెచ్చారు. మేము ఆఫీసులో తెలంగాణా వాదులమే అయినా ఆంధ్రా ఉద్యోగులతో స్నేహంగానే ఉండేవాళ్ళం.. అయితే కొందరికి మా వ్యవహారం నచ్చక ఆంధ్ర వెబ్ సైట్లలో ఏవో పిచ్చి రాతలు రాసేవాళ్ళు. అవి చూసి నవ్వుకున్నాం గానీ ఎవరినీ పల్లెత్తు మాట కూడా అనలేదు. మా పని మేము చేసుకుంటూ పోయాం.. కానీ ఉత్తరాంధ్ర ప్రాంతానికి చెందిన మా నాగరాజుMnr mమాతో చాలా స్నేహంగా ఉండేవాడు. ఎందుకంటే మేము అబద్ధాలు చెప్పలేదు ఉన్నదే చూపించాం.. మిగతా చానల్స్ చూపకపోతే అది మా తప్పు కాదు కదా. ఈ క్రమంలో చాలా ఘోరాలు చూసాం.. ఉస్మానియా గుండెలపై లాఠీల గాయాలు చూసాం.. ప్రముఖ నేతల అరెస్టులూ చూసాం.. పోలీసు దెబ్బలకు గాయపడిన మీడియా సిబ్బందిని చూసాం.. పోలీసు దెబ్బలకు తీవ్రంగా గాయపడిన మా రిపోర్టర్

Nagaraju Gupta

ఇంకా మదిలో మెదులుతూనే ఉన్నాడు.. ఇవేకాకుండా లగడపాటి కుప్పిగంతులు చూసాం.. తెలంగాణా ఉద్యమకారులపై లాఠీ చార్జి చేసిన కరుడుగట్టిన సమైక్య వాది దానం నాగేందర్, తెలంగాణా లేదు ఏమీ లేదంటూ గూండాయిజానికి దిగిన తలసాని శ్రీనివాస యాదవ్ వీరంగమూ చూసాం..వీరంతా ఇప్పుడు అధికారపక్షంలో భోగాలు అనుభవించడం మనకు అనవసరం. దాన్ని కేసీఆర్ విజ్ఞతకే వదిలేద్దాం.. అయితే తెలంగాణ ఉద్యమాన్ని భుజాన మోసిన జీ ఇరవైనాలుగు గంటలు కనుమరుగయ్యే దశకు చేరుకున్నా దాన్ని కాపాడుకునేందుకు తెరాస నాయకత్వం ముందుకు రాలేదు. ఛానెల్ మూతపడటంతో ఉద్యోగులందరూ చెట్టుకొకరు పుట్టకొకరుగా విడిపోయారు. ఎవరైనా లబ్దిపొందారంటే అది వారి వ్యక్తిగత పరిచయాల ప్రభావమే.. అయితే తెలంగాణ ముద్ర పడినందుకు మేమెప్పుడూ గిల్టీగా ఫీల్ కాలేదు ఉన్నదే చూపించాం.. దానికి తోడు మా నరనరానా ఉన్నది తెలంగాణా వాదమే. ఇది ఏమాత్రం తప్పు కాదని నా అభిప్రాయం.. సమైక్య ఆంధ్రా ఉద్యమాన్ని వేరే చానల్స్ నెత్తిన మోయలేదా? సమైక్య ఉద్యమమంటే ఒక విషయం గుర్తుకు వచ్చింది. అప్పట్లో నేనూ మా వాణీ కలిసి వైజాగ్ వెళ్లాం.. అప్పుడు సమైక్య ఉద్యమం నడుస్తోంది.. మార్గం మధ్యలో విజయవాడ దగ్గర ఏదో హడావిడి కనిపిస్తే జర్నలిస్టు బుద్ధి కదా కొంచెం అటువైపు దృష్టి సారించాం.. కొన్ని ఆటో యూనియన్లు, కొంతమంది స్కూల్ పిల్లలతో కలిసి అక్కడ లగడపాటి ధర్నా చేస్తున్నారు.. మొత్తం కలిపి ఓ రెండొందల మంది ఉండవచ్చు.. మరుసటి రోజు పేపర్లో వార్త ఏంటో తెలుసా స్థంభించిన బెజవాడ అని.. ఇలా ఉండేది మీడియా తీరు. నిజానికి సమైక్య ఆంధ్రా ఉద్యమం ప్రజల్లో నుంచి రాలేదని నా అభిప్రాయం. ఒకవేళ అది ప్రజా ఉద్యమమే అయితే గనుక ఈ రోజు ఆంధ్ర రాజకీయాలలో కొత్త నాయకత్వం ఉండేది. సరే ఈ విషయం అలా వదిలిస్తే తెలంగాణా జెండాలు మోసిన మా ఛానల్ కు ఒరిగిందేమి లేదు.. అన్యాయంగా మూతపడినా తెలంగాణా వాదం మాకు ఇచ్చింది ఏమీ లేదు. నేను ఇప్పటికీ తెలంగాణా వాదినే కానీ తెరాస వాదిని కాదు. ఎందుకంటే తెరాస వాదమే తెలంగాణా వాదమంటే నేను మాత్రం ఒప్పుకోను..