పిచ్చిమాలోకం

పిచ్చిమాలోకం

నిజంగా నువ్వు

పిచ్చి మాలోకానివే

ఎంత అమాయకంగా అడిగావు

నేను గుర్తుకొస్తానా నీకూ అని..

అది అమాయకత్వమా

లేక పిచ్చితనమా

అలా ఎలా అడిగేసావు...

ఏమని సమాధానం చెప్పను

ఏ రీతిన నమ్మకం కలిగించను...

పల్ పల్ దిల్ కే పాస్

తుమ్ రహెతీ హో

అంటూ శ్రావ్యమైన గీతంతో అలరించాలంటే

నేను గాయకుడిని కానుగా...

ఓ అందమైన గజల్ కానుకగా ఇచ్చుకోనా

తీయని ఉర్దూ అక్షరాలు

నాకు పరిచయమే కాలేదే...

ఏ భాషలో చెప్పను నీకు

నువ్వు నాలోనే ఉన్నావని...

ఏ అక్షరమాల కట్టను నీకోసం నేను నీ చుట్టే ఉన్నానని...

అక్కడ ఉన్నా

ఇక్కడ ఉన్నా

మరెక్కడ ఉన్నా

నా గుండె సవ్వడిలో

నా పిచ్చిమాలోకం

కదలాడుతూనే ఉంటుందని నిన్నెలా

నమ్మించను

మనస్వినీ...