ఆహా హింస
నీదేముంది పెద్దాయనా
అహింస అహింస అంటూ గొంతు చించుకున్నావ్...
ఎవరికి ఎక్కింది చెప్పు
ఎవరైనా అర్ధం చేసుకున్నారా...
హింసకు రెండు అక్షరాలు జోడించి
ఆహా హింస అంటూ
చెలరేగుతున్నారు అందరూ...
అహింస అంటూ నువ్వు ఎంత మొత్తుకున్నా పాపం
హింసకే బలైపోయావుగా...
నువ్వెళ్ళిపోయాకనైనా
ఈ దేశం మారిందా చెప్పు...
సిద్ధాంతం అంటూ కొందరు
రాజ్యాధికారం కోసం కొందరు
రక రకాల కారణాలతో
అహింసకు పాతరేసి
ఆహా హింస అంటూ
చెలరిగిపోతున్నారే...
పరమత సహనం అంటూ మరో మాట చెప్పి పోయావ్
నీకేంటి ఎన్నైనా చెప్తావ్...
నీకు మాత్రం తెలియదా
శాంతి మంత్రం వల్లె వేసే ఈ మతాలన్నీ హింస
నుంచే పుట్టినవి కావా...
జిహాద్ అని ఒకడు
ధర్మం కోసం మరొకడు
దేవుని రాజ్యం అంటూ ఇంకోడు
భాష వేరైనా
అందరూ నీ అహింసావాదాన్ని
నేలకేసి కొట్టి
ఆహా హింస అంటూ వికట్టహాసం చేయట్లేదా...
నువ్వు చెప్పావ్
నువ్వు పాటించావ్
అలా మేమూ చేస్తామని ఎలా అనుకున్నావ్ తాతయ్యా...
సరే జరిగిందేదో జరిగింది
మరు జన్మ అంటూ ఉంటే
మళ్ళీ అహింస అంటూ గొంతు చించుకోకు
ఆ గొంతే లేకుండా పోతుంది
జై హింస
జై జై హింస
ఆహా హింస
No comments:
Post a Comment