Blogger Tips and TricksLatest Tips And TricksBlogger Tricks

Thursday, 7 June 2018

ఆలోచనావలయం

ఆలోచనావలయం
సమూహం కళకళలాడుతోంది.
అంతా హడావిడి
పిల్లల కేరింతలు
పెద్దవాళ్ళ ముచ్చట్లు
అందరూ నన్ను పలకరిస్తున్నారు..
దగ్గరి బంధువులు
 
దూరపు చుట్టాలు
చిన్ననాటి స్నేహితులు
కుశల ప్రశ్నలు
పరాచికాలు
అందరిలోనే ఉన్నా
అందరితో మాట్లాడుతున్నా
అయినా అందరిలో లేను
మాటలు నాలుక దాటుతున్నా
మనసు మౌనంగానే ఉంది
జనసమూహంలో నేనున్నా
శూన్యంలో ఒంటరినై కూర్చున్నా
ఏమయ్యింది నాకు
ఏ అవసరం అనవసరమై
ఒంటరిని చేసింది నన్ను
మనసు చుట్టూ వలయమై అల్లుకున్న ఆలోచనలతో
అందరిలో ఉన్నా ఒంటరిగానే
మిగిలిపోయాను నేను..

మనసులో లేకుండాపోతావ్

మనసులో లేకుండాపోతావ్


మసీదును కూల్చేయ్ అల్లా పట్టించుకోడు
మందిరాన్ని ధ్వంసం చేయ్
 
రాములోరు కన్నెత్తికూడా అటు చూడరు
చర్చిని పడగొట్టు
జీసస్ కదలనూ లేడు
మనిషి కొలువైన మనసు గుడిని కూల్చకు
మనసులో లేకుండాపోతావ్

నా నేస్తం

నా నేస్తం

ఎంత అందమైనది నా నేస్తం
ఎంత ప్రియమైనది నా నేస్తం
మనసు ప్రశ్నలు వింటుంది
మనసుతోనే సమాధానమిస్తుంది
అదే నేనూ నా మౌనం
అదే నా స్నేహం...

Sunday, 27 May 2018

మట్టి ధూళిని కప్పుకుంటూ

మట్టి ధూళిని కప్పుకుంటూ

అక్కడెక్కడో మల్లెల సౌరభాలు
మత్తైన గుభాళింపులు
పొరలు పొరలుగా కమ్ముకుంటున్నాయి
మాలలుగా మారిన గులాబీ బాలలు
గుండెను ఆర్తిగా పెనవేసుకుంటున్నాయి
ఏదో ఒక సమూహం
అడుగులను అడుగుల్లో కలుపుతూ
జయజయ ధ్వానాలతో ముందుకు సాగుతోంది
పదఘట్టనలతో రేగుతున్న
మట్టి ధూళి కమ్మని వాసనతో
నేనున్నాను పదమంటోంది
దూరమవుతున్న సమూహాన్ని చూస్తూ
ఉండిపోయా
మట్టి ధూళితో నన్ను నేను కప్పుకుంటూ...


Tuesday, 22 May 2018

అయితే నేనూ సంతోషంగానే ఉన్నా

అయితే నేనూ సంతోషంగానే ఉన్నా

అవమానాలను అభిమానాలుగానే మలుచుకోవాలి
జేబులో రూపాయి లేకున్నా లక్షాదికారిలా కనిపించాలి
గాడిద కాలే కాదు కుక్క కాలూ పట్టుకోవాలి
గుండెలో మంటలను చిరునవ్వులతో కప్పుకోవాలి
అపహాస్యాలనూ హాస్యాలుగానే భావించాలి
గుండెలు పగిలేలా రోదించాలని ఉన్నా మంద్రంగానే పలకాలి
కనులనీటినీ పన్నీరని నమ్మితీరాలి
ప్రతి పరాజయాన్నీ విజయంగానే చూడాలి
జీవితంలో నరకం చవిచూస్తున్నా దేవుడి స్వర్గంకై ఎదురుచూడాలి
ఎండమావిలో నీటి జాడ వెతకాలి
విషాదంలోనూ సంతోషాన్ని నటించాలి
అయితే నేనూ సంతోషంగానే ఉన్నా 

Thursday, 17 May 2018

నేనే దేవుడిని

నేనే దేవుడిని

అవును నేనే దేవుడిని
మనిషిని ప్రేమిస్తా
మంచిని ఆరాధిస్తా
చెడును ధ్వేశిస్తా
మతాన్ని చూడను
కులాన్ని పట్టించుకోను
జేబులో చిల్లిగవ్వ లేకున్నా
మాటసాయంలో ముందుంటా
రాములోరి గుడిలో
అత్యాచారాలను ఆపని శక్తి
అల్లా పేరుతో మారణహోమాన్ని ఆపలేని భక్తి
శిలువపై అచేతనంగా వైరాగ్యమూర్తి
స్పందించటమే చేతకాని
మీ దేవుళ్ళకన్నా
మనిషిని మనిషిగా ప్రేమించే మనిషి కదా దేవుడు
అందుకే నేను దేవుడిని...

Wednesday, 2 May 2018

బాల్యమా ఐ లవ్ యూ

బాల్యమా ఐ లవ్ యూ 

ఆకాశం పందిరికింద
నేలమీద దుప్పటి వేసి
చుక్కలను లెక్కిస్తూ
పాలపుంతలతో ఆడుకుని
అలసిసొలసి నిద్దురపోయే ఆ వెన్నెల రాత్రులు
కనులముందు తారాడుతున్నాయి ...
ఊరగుట్టకింద మామిడి తోపులో
కాయలు కోస్తుంటే తోటమాలి అదిరింపులకు
పరుగులు తీస్తే మోకాలి చిప్పలు పగిలిన
ఆ మండుటెండలు ఇంకా ఒంటిని తాకుతూనే ఉన్నాయి ...
చినుకు చినుకుతో పోటీపడుతూ ఆకాశాన్ని అందుకోవాలని
చెరువులోని చేపలు చేసే విన్యాసాలు
ఇంకా కనురెప్పలపై నాట్యం చేస్తూనే ఉన్నాయి...
గిల్లి దండాలు గిల్లి కజ్జాలు
అమ్మా నాన్నలు చేసే బడిత పూజలు
అన్నీ మరిచి మళ్ళీ వీధిలోకి మా అల్లరి అడుగులు
మనసులో ఇంకా గిలిగింతలు రేపుతూనే ఉన్నాయి
ఒక్కసారి గంతంలోకి తొంగి చూసిన మనసుకు
చిననాటి అనుభవాలు వాసంత సమీరాలై పలకరించాయి
జీవన సమరంలో అందరున్నా అనామకుడిగా మారిన నాకు
మళ్ళీ బాల్యంలోకి పరుగులు తీయాలని ఉంది 

Saturday, 28 April 2018

ముగింపు కోసం

ముగింపు కోసం 

ముగింపు ఎక్కడో ఉండే ఉంటుంది
విశ్రాంతి ఎక్కడో సేద తీరుతూనే ఉంటుంది
పరిష్కారం చీకటి రెక్కల నడుమ
దాగి ఉండే ఉంటుంది
వెలుగు రేఖలు ఏ కనుమల చాటునో
నక్కి ఉండే ఉంటాయి
పరిమళాలను
కానరాని పువ్వులేవో పీల్చుకునే ఉంటాయి
నమ్మకం ఏ వంచన కడుపులోనో
ఊపిరి పోసుకుంటూనే ఉంటుంది
విజయం ఏ ఓటమితోనో
పెనుగులాడుతూనే ఉంటుంది
 కానరాని వెలుగులకోసం
ఎక్కడుందో తెలియని ముగింపు కోసం
నడుస్తూనే ఉన్నా
నిరంతర శోధకుడినై 

ఓడిపోవాలని ఉంది

ఓడిపోవాలని ఉంది
ఆనందమిక్కడ క్షణప్రాయమే
మనసు ఇక్కడ తృణప్రాయమే
మురిపించీ మరిపించే చిరునవ్వులు
ఇక్కడ నీటి బుడగలే
మెరిసే వెలుగులు ఇక్కడ
చీకటిలో కరిగే కాంతి పుంజాలే
నిలకడ లేని ఆనందాల కోసం
నాతో నాకు యుద్ధమెందుకు
కనుచూపులో లేని గెలుపుకోసం
ఓటమితో మళ్ళీ మళ్ళీ పోరాటమెందుకు
ఓడిపోవాలని ఉంది శాశ్వతంగా 

గరళవర్షం

 గరళవర్షం
కటిక చీకటిలో
నా నీడను వెతుకుతున్నా
ప్లాస్టిక్ పువ్వులలో
పరిమళాలను చవి చూస్తున్నా
కరకు హృదయాలలో
గుండె సవ్వడులను వింటున్నా
గరళవర్షంలోనూ
అమృతం చుక్కలను దోసిట పడుతున్నా
అందుకే ఇంకా జీవిస్తూ ఉన్నా 

Monday, 23 April 2018

నా ప్రేయసి

నా ప్రేయసి
నా ఆలోచనలను ఇట్టే పసిగడుతుంది
నా ఆలోచనలనే అమలు పరుస్తుంది
నా మనసు ముభావమైతే ముడుచుకు పోతుంది
నా హృదయం నవ్వితే పువ్వులా వికసిస్తుంది
నా మనసులోనే ఉంటుంది
నా మనసును మొత్తం చదివేస్తుంది
నా పెదాలపై చిరునవ్వులా మెరుస్తుంది
నా కనుల నీరులా ప్రవహిస్తుంది
నా కనురెప్పల స్వప్నాలను ప్రేమిస్తుంది
నా ఆగ్రహంలో అగ్గిపువ్వులా రగులుతుంది
నా భావానికి ఒక రూపంలా నిలుస్తుంది
నా మనసు వేదనను అందరికీ పంచుతుంది
నా ప్రేమలో పరిమళమై గుభాళిస్తుంది
నా అక్షరమది
నా అక్షరమే నా ప్రేయసి 

Saturday, 21 April 2018

ఏవీ పూసిన పుష్పాలు

ఏవీ పూసిన పుష్పాలు

ఎటు చూసినా చీకటి తెరలే
మిణుగురు పురుగుల మెరుపులే
దేపం వెలుగుల జాడలే కానరావు
ఏ తోట చూసినా విరబూసిన పుష్పాలే
నాసికను తాకని సుగంధ పరిమళాలే
ప్లాస్టిక్ పువ్వులు తప్ప పూసిన పువ్వులు లేనే లేవు
ఏ నయనం చూసినా జలతారు వెన్నెలే
ఏ అధరం చూసినా కన్నులు జిగేలే
నవ్వుతున్న హృదయం ఆనవాళ్ళే లేవు
ఏ పలుకు విన్నా ముత్యాల వానలే
ఏ గొంతుకను తడిమినా వరాల జల్లులే
మనసును తాకే మాటల ఊసే లేదు
ఏ బంధం చూసినా కురిసే అనురాగాలే
విరబూసే మమతల మతాబులే
తట్టు తగిలిన మనిషికి చేయూతనిచ్చే వారే లేరు
అవసరమనిపిస్తే అందరూ మంచివారే
అవసరానికి బంధం గంధం పూసి అక్కున చేర్చుకునే వారే
అనవసరం మొలకలు వేస్తే పలకరింపులే వినలేవు
దేవుడా నీకిది న్యాయమా
మాయానగరి మనుషుల మధ్య నన్నెందుకు పుట్టించావు


Wednesday, 11 April 2018

నన్ను దోచుకుందువటే

నన్ను దోచుకుందువటే
రాలిపడుతున్న చుక్కను చూసి
నిన్నే కోరుకున్నాను ...
నక్షత్రాల ధూళిలో
నీ ఆనవాళ్ళే వెతికాను
ఆకారం మార్చుకునే మేఘాల్లో
నీ బొమ్మలనే చూసాను...
నవ్వులు రువ్వే పువ్వులలో
నీ చిరునవ్వులనే కోరుకున్నాను
నాకు బాగా గురుతు
నువ్వేలా ఉంటావో తెలియకున్నా
నిత్యం నీ సర్వం నాకోసమే
కోరుకున్నాను...
వచ్చావు నువ్వు ఓ నవ్వులా
విరిసిన పువ్వులా
నాకోసమే వచ్చిన నువ్వు చిత్రంగా
నా నుంచి నన్నే దోచుకున్నావు..
నీకిది న్యాయమా
మనస్విని ...


తెలియదు నాకు

తెలియదు నాకు
ఒంటరినో కాదో తెలియదు గానీ
జనారణ్యంలో నిశబ్ధమే తెలుసు నాకు
ఎవరున్నారో తెలియదు గానీ
ఓ ఆత్మీయ పలకరింపే కరవు నాకు
గమ్యమెక్కడో తెలియదు గానీ
ముళ్ళబాట పయనం తప్పదు నాకు
గాయాలు రుధిరం స్రవిస్తున్నాయి గానీ
లేపనం ఎవరు పూసారో తెలియదు నాకు
శక్తినంత కుడదీసి నడుస్తున్ననే గానీ
ఎప్పుడు పడిపోయానో తెలియదు నాకు 

Thursday, 5 April 2018

అంతానేనే..

అంతానేనే..
మెరిసే చందమామను నేను
కురిసే వెన్నెలను నేను
విరిసే పువ్వు పరిమళం నేను
బతుకు పరిచయం మట్టివాసనను నేను
నమ్మకానికి నేస్తం నేను
వంచనకు గర్జించే పిడుగును నేను
కలిమిలోనూ లేమిలోనూ మీసంమెలేసే పౌరుషం నేను
నాతోనే లోకమంటా నేను
నేనే లేకపోతే ఏదీ లేదంటా నేను

Wednesday, 28 March 2018

ప్రేమించు నన్ను

ప్రేమించు నన్ను
 
మనసు పెట్టి చూడు
కురిసే వెన్నెలలో చందమామ నవ్వులా
మెరిసిపోతాను
కనులు మూసి విను
విచ్చుకుంటున్న మొగ్గలో
చిరుసవ్వడిలా నీ గుండెను
తాకిపోతాను
ఆరాధించు నన్ను
నిత్యం నీ శ్వాసలో ఊపిరిలా
కరిగిపోతాను
ప్రేమిస్తూనే ఉండు
లేతమారాకుపై మంచు బిందులా
తళుకులీనుతూ
జారిపోతాను
ప్రేమించు నన్ను
నీ గుండె శ్రుతిలో లయలా
జాలువారుతూ ఉంటాను
విడనాడకు నన్ను
నీలి నింగిలో తేలిపోయే మబ్బుల్లా
అందకుండాపోతాను


Sunday, 25 March 2018

తెర చాపను కాదు

తెర చాపను కాదు
 
 కదిలే నావకు కట్టిన తెరచాపనా
గాలివాలుకు దిశను మార్చుకునేందుకు
కొత్తనీరుకు అలమటించే చేపనా
ఏటికి ఎదురీదేందుకు
బాట తెలియని బాటసారినా
గమ్యం తెలియక నడిచేందుకు
లోకం పోకడ తెలియని అజ్ఞానినా
మాయానగరిలో మాయమయ్యేందుకు
కొంచెం తడబడ్డానేమో
కుప్పకూలిపోలేదు
దశ మారదని తెలిసినా
దిశను మార్చుకోలేను

Thursday, 22 March 2018

చచ్చేంత ఇష్టం ...

చచ్చేంత ఇష్టం ...
నెలరాజుకు కలువకన్య ఎంత ఇష్టం
విరిసే కమలానికి
సిరివెన్నెల ఎంత ఇష్టం
పక్షిరాజుకు
నీలాకాశం ఎంత ఇష్టం
నువ్వంటే నాకెంత ఇష్టమో
తెలియదు నాకు
ఇష్టానికి కొలమానాలు
లేనే లేవు నాకు
ఒకటి మాత్రం చెప్పగలను
నువ్వు నాలో ఉన్నంతకాలం
నేనంటే చచ్చేంత ఇష్టం నాకు..


నా ఇష్టం...

నా ఇష్టం... 

ఓటమి అంచుకు చేరినా
విజయతీరాను వెతకటం నాకిష్టం...
వెలుగును మింగిన చీకటిలో
నింగిని చూస్తూ
మిలమిల మెరిసే నక్షత్రాలలో
మెరుపును కనులలో నింపుకోవటం
నాకిష్టం...
ఉషోదయపు కిరణాలతో
చీకటిమరకలను తుడుచుకోవటం
నాకిష్టం...
తన్నుకుపోవాలని చూసే రాబందులలో
బంధువులను వెతకటం
నాకిష్టం...
వెన్నెలైనా
చీకటైనా
నా మనసుదీపం ఆరకుండా
చూసుకోవటం
నాకిష్టం...
పునాదులు కరిగిపోతున్నా
శిఖరమై నిలవడమే
నాకెంతో ఇష్టం...

Wednesday, 14 March 2018

వెళ్ళిరానా ఆ లోకానికి

వెళ్ళిరానా ఆ లోకానికి


మరో లోకం అంచుల్లో
విహరించాలని ఉంది...
మబ్బు తునకలతో
గూడు కట్టుకోవాలని ఉంది...
చందమామ వంపును
జారుడుబల్లగా చేసి
ఆడుకోవాలని ఉంది...
చుక్కలవీధిలో
స్వేచ్ఛా విహంగమై
విహరించాలని ఉంది...
నవ్వే తారకల చిరునవ్వులను
ఒడిసి పట్టాలని ఉంది...
దేవుడికెంత స్వార్ధం
తానొక్కడే అక్కడ కూర్చుని
ఇక్కడ నాతో ఆడుకుంటున్నాడు...
భువినుంచి దివికి
మెట్లు కట్టి ఉంటే
వెళ్ళిరానా ఆ లోకానికి
మనసు ముభావమైన వేళ...

Saturday, 10 March 2018

మనసు కార్ఖానా

మనసు కార్ఖానా

మనసు కార్ఖానా ఉందా ఎక్కడైనా
తెలుసా దాని చిరునామా ఎవరికైనా
మరమ్మత్తు చేసుకోవాలి మనసుకు ఇకనైనా
మార్చుకోవడమే మంచిది మనసును ఎందుకైనా
ఉన్నతంగా ఆలోచించమంటే వినదు ఎంతైనా
మామూలు మనసునే అంటుంది ఎప్పుడైనా
పిచ్చిగానే ప్రేమిస్తుంది వద్దని వారించినా
అంతా నాదేనని మారాం చేస్తుంది ఏదైనా
వాస్తవాలు గ్రహించదు ఏ పరిస్థితి ఎదురైనా
శస్త్ర చికిత్స చేయాలి మనసుకు ఎలాగైనా
అడవి మనసును పట్నం మనసుగా మార్చాలి కొంతైనా
పాత పచ్చడిని తీసేసి అభ్యుదయం అద్దాలి ఇప్పుడైనా
నాగరికత నేర్పాలి మనసుకు ఏం చేసైనా
ఉన్నదా ఎక్కడైనా మనసు దవాఖానా
తెలుసా దాని చిరునామా ఎవరికైనా 

Friday, 9 March 2018

అరణ్యవాసినా

అరణ్యవాసినా

అర్థం కాని వ్యర్థమైన ఆలోచనలకు
భావుకత ముసుగేస్తూ
అక్షరాలు రాసుకుంటూ ఉంటా ...
వేకువ పొడుచుకువచ్చినా
చల్లని వెన్నెలకై నీలి నింగి వైపు
ఆశగా ఎదురుచూస్తూ ఉంటా ...
ఓటమి శిలను నెత్తిన మోస్తూ
తెలియని విజయం కోసం
పిచ్చిగా పరుగులు తీస్తూ ఉంటా ...
జనారణ్యంలో ఉంటూ
కీకారణ్యం విధానాల కోసం
శాసనాలు రాస్తూ ఉంటా ...
ఓ చీకటి తెరను భగ్నం చేసి
మరో చీకటి దుప్పటిని కప్పుకుని
కృష్ణ బిలంలోకి జారిపోతూ ఉంటా ...
తెలియని నిజం కోసం అబద్ధాలను ముద్దాడుతూ
అలుపెరుగని బాటసారినై నిత్యం శోధిస్తూనే ఉంటా ...
కూలిన శిఖర శిథిలాలను తోసిరాజని
పేకమేడలు నిర్మిస్తూ  
నిర్జీవ రాజ్యానికి నియంతలా నిలిచి ఉంటా ...
నేను కవినా
అరణ్యవాసినా
వేకువలో వెన్నెలనా
ఎన్నడూ పలకరించని గెలుపునా
గమ్యమే తెలియని బాటసారినా
అనంతకోటి ప్రశ్నలను
నాపై నేనే సంధించుకుంటూ ఉంటా ...