Blogger Tips and TricksLatest Tips And TricksBlogger Tricks

Pages

Monday 1 June 2015

మావూరు మా బంధం

మావూరు మా బంధం

చిమ్మ చీకటిని చీల్చుకుంటూ
ఉదయభానుడు తొంగి చూసే సమయం

మబ్బు తెరలు తొలిగి
వెలుగులమ్మ నడియాడే పసందైన దృశ్యం

నిద్ర మత్తు వీడక కనురెప్పలు తెరుచుకోక
మళ్ళీ దుప్పటిలోకి దూరిన వైనం

మేలుకో ఇంకా నిద్దురెందుకు అంటూ
పక్కింటి పుంజు గారి మేలుకొలుపు

మామిడాకుల మాటునుంచి
కోయిలమ్మ సుప్రభాతం

మేమూ ఉన్నామంటూ పక్షుల బృందగానం
కూయిలమ్మ కువకువలు
పక్షుల కిలకిలారావాలు

మధుర సంగీతమై సవ్వడి చేయటంతో
మెల్లగా కన్నులు తెరిచాను నేను

మా ఇంట్లో నిత్యం
ఇదే నాకు శుభోదయం

సాయం సంధ్య వేళలో
చల్లని పిల్లగాలులను ఆస్వాదిస్తూ
ఇంటి ముందు కూర్చుంటే

ఏం మామా బాగున్నావా
అల్లుడా తిన్నావా
ఆత్మీయ పిలుపుల ఆలింగనం

నాకెవరూ ఏమీ కారు
నా మతం కాని మతం

అయినా అందరూ నా వాళ్ళే
రక్త సంబంధాన్ని మరిపించి

ఆత్మీయ బంధాన్ని విరబూసి
వెలకట్టలేని అభిమానాన్ని కురిపించే
ఈ మట్టి మనుషులందరూ
నాకు బంధువులే

ఆ పలకరింపులు 
మా అందరికి ప్రాణవాయువులే

అవును ఇది మా వూరు
నా బాల్యం గడిచిన పసందైన ఆవాసం

నగరీకరణ మార్పుల ప్రభావం అంతో ఇంతో పడినా
మట్టి వాసన వీడని అందమైన గ్రామం

అపార్ట్ మెంట్ జీవితాలతో
యాంత్రిక జీవనం గడిపే డబ్బు మనుషుల

డాబూ దర్పం కానరాని ప్రాంతం
మనసు నిండా పలకరింపులు

గుండె నిండా అభిమానాలు
కులమతాలు పట్టని బంధుత్వాలు
ఇవే మావూరి జీవన సౌరభాలు

జీవన బాటలో అడుగులు అటూ ఇటూ
పడినా మావూరిని మరువలేదు నా మనసు

కడ ఊపిరి దాకా ఇక్కడే
కొనసాగుతుంది నా బతుకు

నీలి కాన్వాసుపై కదిలే బొమ్మల్లా
గగన వీధిలో విహరించే

పక్షులను చూస్తూ
కదిలే మేఘాల్లో

మనసుకు నచ్చిన ఆకృతులను గుర్తిస్తూ
సాయంకాలం అలా గడిచిపోతూ ఉంటే

నిజంగా మావూరు
ఎంతో అందమైన ప్రదేశమే కదా

No comments:

Post a Comment