అన్నీ
తెలుసు
కాలి నడక తెలుసు
పాదాలకు పూసిన గాయాలు తెలుసు
జోరువానలో తడవటం తెలుసు
మండే ఎండలో సొమ్మసిల్లి పడిపోవడం తెలుసు
ఆకలి మంటలు తెలుసు
కన్నీళ్లు తాగి బతికిన వైనం తెలుసు
అవమానం తెలుసు
అవమానం మాటున దాచుకున్న అభిమానం తెలుసు
బతుకుపోరాటం తెలుసు
పోరాడి ఓడిన ఆవేదనా తెలుసు
చేయూతలేని సమరంలో
నా గెలుపులూ తెలుసు
స్నేహం తెలుసు
స్నేహం ముసుగులో ద్రోహం తెలుసు
ఒక్కో మెట్టూ ఎక్కడం తెలుసు
కాలు జారి కిందపడటమూ తెలుసు
పడుతూ లేస్తూ ముందుకు నడవటం తెలుసు
ఒడ్డును తాకి వెనక్కి పడినా ముందుకే సాగే
కెరటాన్ని నేను
ఈ చరిత్రలో ఒక మామూలు మరకను కాదు
ఒక బలమైన ముద్రను నేను
