Blogger Tips and TricksLatest Tips And TricksBlogger Tricks

Sunday, 31 December 2017

కొత్త సీసాలో పాత సారా

కొత్త సీసాలో పాత సారా 

వెళ్లిపోతున్నావా నువ్వు
వెళ్ళిపో ఆలస్యమెందుకు ఇంకా
నువ్వెళ్ళిపోయాక తనేలాగూ వస్తుంది వద్దన్నా ...
నీకు మనసునిండా వీడుకోలు చెప్పను
వచ్చేదానికి హృదయం పరిచి స్వాగతం పలకను
నా ప్రమేయమేమీ లేకనే రాకపోకలు జరిగిపోతాయి ...
నీవల్ల ఒరిగిందేమీ లేదు
రేపేదో జరిగిపోతుందనే భ్రమలూ లేవు
నువ్వంటే రవ్వంత అభిమానమూ లేదు
కొండంత ఆవేదన తప్ప ...
ఎన్ని అనుభవాలు చూపావు
వంచనా శిల్పాన్ని పరిచయం చేసావు
తడి గుండెలో మంటలు రేపావు
ఎందుకు ఆపాలి చెప్పు నిన్ను ...
అయినా ఆగమంటే ఆగుతావా
వద్దంటే నిలిచిపోతావా
వీడిపోయేందుకు క్షణాలు లెక్కపెడుతున్నావుగా ...
తరలివచ్చే క్షణమేమన్నా పూవులు విసురుతుందా
చిరునవ్వుల మతాబులు కానుకలుగా ఇస్తుందా
ఇలావచ్చి అలా వెళ్లక నిలకడగా ఉంటుందా ...
పోయేదానిపై గౌరవమూ లేదు
వచ్చేదానిపై నమ్మకమూ లేదు
కొత్త సీసాలో పాత సారా యవ్వారమంతా ...
అందుకే నువ్వెళ్ళిపో
వచ్చేదానికి చోటిచ్చిపో
కుడిఎడమైనా పొరపాటు లేదంటూ
అన్యమస్కంగానే రమ్మంటున్నా
వెల్ కం టూ న్యూ ఇయర్

Friday, 29 December 2017

ఈ రాతిరి నన్నిలా మరణించనీ

ఈ రాతిరి నన్నిలా మరణించనీ 

గుడ్డిదీపం వెలుతురులో కానరావటం లేదు
నీ అరమోడ్పు కన్నులు మరికాస్త వికసించనీ ...
జామురాతిరి జామ్ కైపులకు సోలిపోలేదు
నీ కనులజారే మధువును మత్తుగా తాగనీ...
హృదయవేగం పెరిగి ఊపిరి సవ్యంగా లేదు
నీ ఊపిరితో నాకు శ్వాసను పోసి గుండెను నెమ్మదించనీ...
ఆకలి పెరిగి దేహంలో నిలకడ లేదు
గులాబీ పెదాల మధురసాలను మనసునిండా ఆస్వాదించనీ...
చలిగాలికి తనువంతా వణుకు ఆగేలా లేదు
నీ దేహాన్ని నాకు కప్పి చల్లగాలికి చెమటలు పట్టించనీ...
మిసమిసలాడే నీ పరువాల ప్రశ్నలకు అంతే లేదు
అనుభవంతో ధీటైన సమాధానం చెప్పనీ...
నిప్పులకొలిమి మన పరిష్వంగం విడిపోనివ్వదు
వలపువానై కురిసి మంటలు చల్లార్చనీ...
ఈ ఘడియలో మనకు మరో జీవితమే లేదు
ఈ రాతిరి నన్నిలా మరణించనీ...

Saturday, 23 December 2017

HAPPY BIRTHDAY MAMMOO…

HAPPY BIRTHDAY MAMMOO

నా తలపై వేళ్ళతో నిమురుతూ
నుదుటిపై చుంబనంతో
మెలకువ నేర్చిన కన్నులను నిద్రపుచ్చుతూ
నేనిక్కడే ఉన్నా ఏంకావాలన్నా కాల్ మీ
గుడ్ నైట్ పప్పా అంటూ నాగది తలుపులు వేసి వెళ్తున్న
తనను చూస్తే నా అమ్మేనేమో అనిపిస్తుంది ...
కళ్ళు తెరిచానో లేదో మార్నింగ్ పప్పా అంటూ
వాటేసుకునే తన స్పర్శలో నాకు
ప్రపంచాన్ని గెలిచిన ఆనందం దొరుకుతుంది ...
చెంగు చెంగున  లేడిపిల్లలా గెంతుతూ
నవ్వులు పూయించే తనను చూస్తుంటే
నా చిన్ని పొదరిల్లు ఆనందాల పూదోటలా కనిపిస్తుంది ...
నా గారాలపట్టి నాజీవితంలో కూతురు పాత్ర కన్నా
అమ్మ పాత్రకేఎక్కువ జీవం పోస్తున్నది
నా చిట్టి తల్లి కాదు కాదు మా అమ్మ పుట్టిన రోజు ఈరోజు
కూతురుగా పుట్టి అమ్మ ప్రేమను పంచుతున్న
మా ఇంటి యువరాణికి
మనసునిండా జన్మదిన శుభాకాంక్షలు ...


Tuesday, 19 December 2017

సాగిపోతున్నా నీకు అందనంత దూరంగా

సాగిపోతున్నా నీకు అందనంత దూరంగా 

అవును నిన్న మొన్నటిదాకా ఇది నిజం
నీగురించి నేను ఆలోచించిన మాట నిజం
ఇప్పుడు నా ఆలోచనల్లో నువ్వు లేవు
ఒకవేళ నువ్వు ఆలోచనా స్రవంతిలో
లీలగా తారసపడినా
నువ్వంటే నా మనసు కరగటం లేదు
ఎందుకంటే నా మనసుపుస్తకం పేజీలలో
నీ అక్షరాల గొంతుకను నువ్వే నులిమేసావు
నీకోసం నేను వేదన చెందినదీ నిజమే
ఇప్పుడు నా ఆవేదనలో నువ్వు లేవు
నా తలపుల తలుపులకు నువ్వే తాళం వేసివెళ్లావు
నీకోసం నేను కన్నీరు కార్చిందీ నిజమే
ఇప్పుడు నా కన్నీటి తెరలపై నీ రూపం కానరాదు
కురిసిన నా కన్నీటివానలో నీ జ్ఞాపకాలను
నువ్వే కడిగేసుకుపోయావు
హృదయకోవెలలో నీరూపం నిలిచిందీ నిజమే
ఇప్పుడు మనసు గర్భగుడి వెలవెలబోతోంది
అక్కడినుంచి నువ్వే తరలిపోయావు
నా కనురెప్పల మైదానంలో కలల పొదరిల్లు
ఇంకా కదలాడుతూనే ఉంది
నువ్వే విడిచివెళ్లావు అడుగుజాడలను చెరిపేసుకుంటూ
నీ ఆలోచనలను విసిరేసి
కాలమనే నేస్తంతో ముందుకు సాగుతున్నా
నీకు ఎప్పటికీ అందనంత దూరంగా 

Wednesday, 13 December 2017

ఇలా అయితే ఎలా

ఇలా అయితే ఎలా

ఎంత వారించినా విననే విననంటావు
అదిలించినా అదుపే లేదని అంటావు
బెదిరించినా భయమే లేదని అంటావు
ఒక్క క్షణం కుదురుగా ఉండలేనని అంటావు
ప్రతినిమిషం అటో ఇటో వెతుకుతూనే ఉంటావు
వేకువలో వెన్నెలను కోరుకుంటావు
నింగిలో తారకలను ఏరుకుంటానని మారాం చేస్తావు
 ఒక పువ్వు నచ్చిందని వాలిపోతానని ఉబలాటపడతావు
పువ్వు పువ్వుకూ ముల్లున్నదని తెలుసుకోలేనంటావు
ఒక గాయం మాననే లేదు మరో గాయం కోసం ఆరాటపడతావు
మనసా నీతో ఎలా వేగమంటావు
నిన్నే కారాగారంలో దాచుకోమంటావు


Wednesday, 6 December 2017

మామూలు మనిషిని నేను

మామూలు మనిషిని నేను

వయ్యారి తారకలకు ప్రేమికుడిని నేను
వెన్నెలరాజు నెలవంకకు నేస్తానిని నేను
నీలినింగిపై తేలియాడే మేఘమాలికలకు ఆప్తుడిని నేను
గిలిగింతలు రేపే చిరుగాలిలో సవ్వడిని నేను
వికసించే పువ్వులో మెరిసే నవ్వును నేను
మైమరిపించే ప్రకృతికాంతకు దాసుడిని నేను
నక్షత్రాల మెరుపులో అక్షరాలను ఏరుకుంటా
చందమామ వెన్నెలలో భావాలను దోచుకుంటా
అక్షర విన్యాసాలు తెలియదు నాకు
యాసప్రాసాల ప్రాకులాట రానేరాదు నాకు
పామరులకు తెలియని పదాలు రావునాకు
భాషాకోవిదుల పాండిత్యం అబ్బలేదు నాకు
మనసుపువ్వులను అక్షరాలుగా
అప్పుడే పుట్టిన ఆలోచనలు భావాలుగా
నాదైన లోకంలో విహరిస్తూ
తెలిసిన భాషలో పదాలు అల్లుకునే నేను
కవిని కానే కాను
ఓ మామూలు మనిషిని 

Thursday, 30 November 2017

మనసు లేఖను నువ్వే రాసుకో

మనసు లేఖను నువ్వే రాసుకో

మెరిసే నక్షత్రాలను అక్షరాలుగా మార్చుకోనా
నవ్వే పువ్వులను నా భావాలుగా మలుచుకోనా
చందమామకు నా మనసు గోడును చెప్పుకోనా
వెండివెన్నెలలో కలిపి నా శ్వాసను తెలుపుకోనా
నీలి నింగి మబ్బులతో నా సందేశం పంపనా
చల్లని చిరుగాలికి నా మనసు విప్పి చూపనా
ప్రేమలేఖ రాయాలని ఉంది అక్షరాలను వెతికి పట్టనా
చెదిరిపోయి పరుగులుతీస్తున్న అక్షరాలకు తలవంచనా
మనసుమాట చెప్పాలని ఉంది మౌనానికి సవ్వడి నేర్పనా
ఏ భాషలో చెప్పాలో తెలియక తెలియని పాండిత్యం నేర్చుకోనా
హృదయ సవ్వడి చెప్పేందుకు మాటలు లేవు నాలో
ప్రేమలేఖ రాసేందుకు అక్షరాలే లేవు నాలో
నా మనసు పుస్తకం తెరిచిపెడుతున్నా
అక్షరాలను కూర్చి నా మనసు లేఖను నువ్వే రాసుకో

Thursday, 23 November 2017

కరిగిపోనీ నన్ను చుక్కలు చుక్కలుగా

కరిగిపోనీ నన్ను చుక్కలు చుక్కలుగా
 
ఎందుకింత తొందర ఈ కాలానికి
గడియారం ముళ్ళు ఎందుకు పరుగులు తీస్తున్నాయి...
సూరీడుకి ఇంత తొందర ఎందుకు
చల్లని వెన్నెలను తాగేసేందుకు ఉబలాటపడుతున్నాడు...
నిశిపరదాలు ఎందుకు తాము కరుగుతూ
ప్రభాత కిరణాలకోసం తహతహలాడుతున్నాయి...
సమయం నా ఆరాటానికి ఎందుకు హద్దులు గీస్తోంది
కాలం ఎందుకు వేగిరపడుతున్నది ...
ఇప్పుడే వచ్చావు అప్పుడే వెళ్ళిపోయే ఆత్రం ఎందుకు
నేనింకా మనసు నిండా నిన్ను చూడనే లేదు...
ఘడియలను క్షణాలుగా నీ బింకంలోనే కరిగించావు
వాలిన కనురెప్పల మాటున సగం వెన్నెల రేయిని దోచేసావు...
నీ అధరమధురిమలను మౌనానికే అరువిచ్చావు
ఎగసిపడే పరువాలతో కవ్విస్తూ
దరికి చేరితే దూరం జరుగుతావు...
మనసుతో మనసును మాట్లాడించి
పొగరుతో సొగసును కరిగించి
వయసు సమరానికి నగారా మోగితే
వేళకానే కాదంటూ కాలం ఉరుకులు పెడుతోంది...
కాలమా నీకెందుకు ఇంత తొందర
ఆగిపో పూబంతి నా చెంత ఉండగా
కరిగిపోనీ నన్ను చుక్కలు చుక్కలుగా ...

Saturday, 18 November 2017

తేరీ తలాష్ ఆజ్ భీ హై

తేరీ తలాష్ ఆజ్ భీ హై

ఆజ్ భీ మేరీ నిగాహ్ ఆస్మాన్ కీ ప్యాసీ హై...
బేచైన్ మన్ కో ఆజ్ భీ తేరీ తలాష్ హై...
ఊహ తెలిసిన నాటినుంచి నీకోసమే
ఎదురుచూసాను
చుక్కలతో మెరిసే ఆకాశంనుంచి
మిలమిలా మెరిసే ఒకతారకలా దిగివస్తావని...
ఊహలకే పరిమితమైన నువ్వు
నిజంగా లేవని తెలిసినా
ప్రతి పున్నమి వెన్నెలలో నిన్ను వెతికాను
అందమైన ఆడపిల్లలా ఆడుకుంటున్నావేమోనని...
చిన్న వయస్సులో పిచ్చి కల్పనలేమిటని లోకం నవ్వినా
భావుకతలోనే మునిగితేలాను
ఊహాసుందరి కనిపిస్తుందేమోనని...
తిరుగుతున్న గడియారం ముళ్ళ ఆదేశాలను పాటిస్తూ
క్యాలెండర్ పేజీలు  మారుతున్నా
పరిమాణాలకు నేను తలవంచినా
శోధన మానుకోలేదు
కల నిజం చేస్తూ నువ్వు వస్తావని...
అందమైన పూదోటలా ఒక పువ్వు మనసును తాకితే
పులకించిపోయింది హృదయం
నువ్వు వచ్చేసావనీ...
ఊహాసుందరి నిజమై మనసును తాకితే
రక్తం కారేదాకా తెలియలేదు
గుండెకు గుచ్చుకుంది పువ్వుకాదు ఒక ముల్లని...
నా పిచ్చికాకపోతే మరేంటి
ఊహలలో నాతో ఆడుకునే నువ్వు
నిజమై ఎలా వస్తావు...
ఒక అందమైన భావపుష్పమై
మధురమైన స్వప్నమై
నా కనురెప్పలపైనే ఉండిపో
ఎప్పటికీ నిజమై రాకు
ఒక కలగానే నువ్వు అందంగా ఉంటావు
నేను మాత్రం తుది శ్వాసదాకా
నీకోసం నిరీక్షిస్తూనే ఉంటా...

Thursday, 16 November 2017

అంతా నిజమే

అంతా నిజమే

నీ ప్రేమ నిజం కాకపోవచ్చు
నేను ప్రేమించింది నిజమే
నీ అనురాగం ఒక మాయ కావచ్చు
నా అనుభూతులన్నీ నిజాలే
నీ కనులలో నారూపం చెదిరిపోవచ్చు
నా కళ్ళలో నీ రూపం మాయకాదు
కలలన్నీ కాల్పనిక గాథలే అని నువ్వు సరిపెట్టుకోవచ్చు
నా కనురెప్పలపై కలల తాలూకు తడి ఇంకా ఆరనే లేదు
అన్నీ నువ్వు తేలికగానే మరిచిపోవచ్చు
నా జ్ఞాపకాలన్నీ పచ్చి నిజాలే

Monday, 13 November 2017

చలిమంటలు వేసి పో

చలిమంటలు వేసి పో

శరదృతువు సరసమాడుతోంది
వడివడిగా వస్తున్న హేమంతం గుబులురేపుతోంది
శిశిరం ఆలోచనే కలవరం కలిగిస్తోంది
రుతువులన్నీ కలిసి కత్తికడుతున్నాయి
మంచు తీగలుగా మారిన
శీతల శరములు దేహాన్ని గుచ్చుకుంటున్నాయి
ఘనీభవించిన రుధిరం కరుగుతూ బుసలు కొడుతోంది
శరతుడికే సవాలు విసురుతూ
మెరుపుతీగవై కదిలిరా
హేమంతుడిని నిలువరిస్తూ
పరువాల సెగలతో అభిసారికవై దరికి రా
వయసు సమరానికి శంఖం ఊది
సొగసు వెలుగులతో కాగడా వెలిగించి
తనువుల రణంతో అగ్గిని పుట్టించి
శిశిరాన్నీ కరిగించి పో
ఒంటరిదైన మనసుకు
జతలేని తనువుకు
ఎవరో తెలియని నువ్వే నేనై
చలిమంటలు వేసి పో 

Wednesday, 8 November 2017

పావురంతో ప్రేమలేఖ

పావురంతో ప్రేమలేఖ

కాకితో కబురు పంపమాకు
అది రెండుముక్కలు చెప్పి ఎగిరిపోతుంది
పావురంతో ప్రేమలేఖ పంపు
అది నీ మనసు మొత్తం చదివి వినిపిస్తుంది
నీలి మేఘమాలికలను నమ్ముకోమాకు
అవి ఉరుములై మెరిసి మాయమైపోతాయి
చల్లని వెన్నెల జాబిలికి మనసు కథలు చెప్పు
అవి రేయంతా నాతోనే ఉండిపోతాయి
నీతోటలో పూచిన గులాబీలను పంపమాకు
రెండు ఘడియల్లోనే అవి వాడిపోతాయి
నీ మనసులో ఉదయించిన అక్షర పుష్పాలను పంపు
అవి నా మనసులో నిత్యం పరిమళిస్తూనే ఉంటాయి
నిన్ను సుతారంగా తాకి జారిపోతున్న
పిల్లగాలులను అదిలించమాకు
అవి నీ శ్వాసను అరువుతెచ్చి నాకు
కొత్త ఊపిర్లు అందిస్తూనే ఉంటాయి

Monday, 6 November 2017

రాళ్ళు కాదు అవి నాకు పువ్వులే

రాళ్ళు కాదు అవి నాకు పువ్వులే 

రాళ్ళు విసురుతూనే ఉండు
అవి నన్ను పువ్వులుగానే తాకుతూ ఉంటాయి
విధ్వంసమే నీ విధానమైతే
ప్రేమతత్వమే నా సిద్ధాంతం
నిత్యం పరిమళిస్తూనే ఉంటాను
అసత్యశరములు సంధిస్తూనే ఉండు
సత్యకవచము నన్ను కాపాడుతూనే ఉంటుంది
అధర్మానికి నువ్వు ఆలవాలమైతే
ధర్మం నావైపే నిలిచి ఉంది
నా మతాన్ని తూలనాడుతూ ఉండు
మతాలన్నింటికీ నేను తలవంచే ఉంటా
నీ మతములోనే  నీకు దిక్కు లేకున్నా
అన్ని మతాలూ నాతో అభిమానంగానే ఉన్నాయి
ఎక్కడికీ పారిపోలేదు నేను
ఇక్కడే నిలిచి ఉన్నా
తుది శ్వాసదాకా శిఖరమై
నిలబడే ఉంటాను

Friday, 3 November 2017

నిన్నే ప్రేమిస్తా

నిన్నే ప్రేమిస్తా 


అవసరార్ధ ప్రేమబాటలో నేస్తమై నడుస్తున్నావు
రాబంధువుల లోకంలో రక్షణకవచమై నిలుస్తున్నావు
నడకలు తడబడితే నడతలు నేర్పుతూ అడుగుజాడలు విడుస్తున్నావు
దారులన్నీ మూసుకుపోతే మార్గదర్శివై దిశను చూపుతున్నావు
కటికచీకటి కమ్ముకుంటే కాగాడాలా వెలుగునిస్తున్నావు
ఎవరు మార్గాలను మార్చుకున్నా నువ్వు మాత్రం నీడలా అనుసరిస్తున్నావు
మోసం దగాల మాయానగరిలో నా వేలుపట్టి నడిపిస్తున్నావు
శ్వాస ఆగిపోయే తరుణంలో గుండెకు కొత్త ఊపిరులు పోస్తున్నావు
ముభావమైన మనసులో కొత్త భావాలు పూయిస్తున్నావు
నవ్వులు మరిచిన పెదాలకు కొత్త నవ్వులు నేర్పుతున్నావు
నన్ను నీలో కలుపుకుని నాలోనే నువ్వు దర్శనమిస్తున్నావు
అందుకే నిత్యం నేను నిన్నే ప్రేమిస్తున్నాను
నీ బాటలోనే నడుస్తున్నాను
నా దేహంలో జీవం ఉన్నంతవరకు
ఓ అంతరాత్మా నేను నిన్నే ప్రేమిస్తూ ఉంటాను