ఓడిన కల

ఓడిన కల

మౌనమై రగిలే ఘోషకు అంతం ఎక్కడ

ఎగసిపడే మనసు కెరటాలకు సాంత్వన ఎప్పుడు

చీకటికి పట్టిన చెమటల తడియారేది ఎన్నడు

మూసుకపోయిన కనురెప్పలకు గవాక్షాలు ఎవ్వరు

బంధీగా మారిన మనసు

సంకెళ్లు తెంచేది ఎప్పుడు

స్వేచ్ఛకోసం కదిలే పాదాలకు బాటలు చూపే ధైర్యం ఎక్కడ

ఆంక్షల తలుపులు బద్దలయ్యేది ఎప్పుడు

ఏమో ఒకనాడు అడుగుపెడతానేమో

జనారణ్య ఆవాసాలవైపు

ఆకాశహర్మ్యాలన్నీ శిథిల సమాధులై స్వాగతం

పలుకుతాయేమో

శిథిల శకలాల మడుగున

ఓడిపోయిన నా కలలను

వెతుకుతుంటానేమో

అవి ఎన్నడూ దొరకవని తెలిసినా...