నీలోనే నేను

నీలోనే నేను

నాలో నుంచి నేను మాయమై

నీలోనే నిండిపోవాలనీ

నువ్వే నేనై నేనే నువ్వై

మనముగానే మిగిలిపోవాలనీ

ఎన్నిసార్లో అనుకున్నా

నీ కనుల కమలాల నుంచి జారిపడే

నీటి చుక్కలను దోసిటపట్టి

తడియారిన నా కనురెప్పలలో

నింపుకోవాలనీ

ఎంతగానో కోరుకున్నా

చిగురుటాకు పెదాల నుంచి జారిపడే

నోటి ముత్యాలలో వెన్నెల మెరుపును కావాలనీ

నీ తీయని పలుకుల అర్ధమే నేనై

పరమార్ధం నేనై

మిగిలిపోవాలనీ

ప్రతి క్షణం పరితపించా

నీ శ్వాసకు ఊపిరిపోసి

గుండె గుడిలో ప్రమిదకు ఇంధనం నేనవ్వాలనీ

మనసు నిండా ఆరాటపడ్డా

నా మనసు విలువ తెలియని నీ మనసులో

రగిలిన వేదనకు సమిధగా మిగిలిపోయా

నా గురించికాదు

నీ గురించి నువ్వు ఆలోచించు

నీ ప్రతి ఆలోచనలో

నేనే కనిపిస్తా