ముగింపు కోసం
ముగింపు ఎక్కడో ఉండే ఉంటుంది
విశ్రాంతి ఎక్కడో సేద తీరుతూనే ఉంటుంది
పరిష్కారం చీకటి రెక్కల నడుమ
దాగి ఉండే ఉంటుంది
వెలుగు రేఖలు ఏ కనుమల చాటునో
నక్కి ఉండే ఉంటాయి
పరిమళాలను
కానరాని పువ్వులేవో పీల్చుకునే ఉంటాయి
నమ్మకం ఏ వంచన కడుపులోనో
ఊపిరి పోసుకుంటూనే ఉంటుంది
విజయం ఏ ఓటమితోనో
పెనుగులాడుతూనే ఉంటుంది
కానరాని వెలుగులకోసం
ఎక్కడుందో తెలియని ముగింపు కోసం
నడుస్తూనే ఉన్నా
నిరంతర శోధకుడినై
