Blogger Tips and TricksLatest Tips And TricksBlogger Tricks

Monday, 7 December 2015

అదే నేను అదే మనసు

అదే నేను అదే మనసు 

నీ కన్నుల వెన్నెలలో
రాలిపడిన నక్షత్రాల పొడిని
నా కనురెప్పలపై
స్వప్నాలుగా అద్దుకున్నా
నీ నవ్వుల రువ్వులలో
పువ్వులను ఏరుకుని
గుండె గుడిలో దాచుకున్నా
తీయని పలుకుల
మధురిమలను
మనసునిండా పులుముకున్నా
ప్రతిక్షణం
ప్రతికణం
ప్రేమసాగరంలో
పునీతం చేసుకున్నా
ఎందుకో ఏమో
ఇప్పుడు మనసుకు భయం వేస్తోంది
అప్పటిలా
ఇప్పుడూ ఉన్నా
ఎక్కడున్నానో
అక్కడే ఉన్నా
కనురప్పలపై నుంచి జారిన
నక్షత్రాల పొడి
కన్నీటి పొరలలో కరిగిపోతోందేమో
అల్లుకున్న స్వప్నాలన్నీ
కన్నీటి చుక్కలతో స్నేహం చేసి
ఆవిరైపోతున్నాయేమో
గుబులుగా ఉంది గుండెలో
దాచుకున్న పువ్వులన్నీ
సుడిగాలి కుట్రలకు
ఎగిరిపోతాయేమో
భయం ఒకవైపు మొలకలు వేస్తున్నా
దానిపక్కనే భరోసా
చిగురిస్తోంది
రాలిపడుతున్న నక్షత్రాల పొడిని
మరలా ఒడిసి పట్టుకుంటా
సుడిగాలికి
గుండె కవాటాలు అడ్డం వేస్తా
ఆ నవ్వుల పువ్వులను
మరలా పూయిస్తా
కఫన్ నీడన నడుస్తున్న నేను
ఆ భరోసా వెంటనే
సాగిపోతూ ఉంటా
మనస్వినీ

No comments:

Post a Comment