నీకు సలాం మనస్వినీ

నీకు సలాం మనస్వినీ

నువ్వొక అద్భుతం
నిజంగానే నువ్వొక ఆశ్చర్యం...
నిన్ను చూస్తుంటే
నీగురించి ఆలోచిస్తుంటే
భావాలకు అందని నీ వ్యక్తిత్వం కనిపిస్తోంది...
పూర్తిగా విరుద్ధమైన భావజాలం నుంచి, ఏమాత్రం పొసగని సాంప్రదాయాలనుంచి
నా జీవితంలోకి అడుగిడినావు...
సంఘర్షణాత్మక ఆలోచనా పరిధులను దాటి
ఒక పటిష్ఠమైన భావజాలాన్ని నిర్మించుకుని
నేను ఆచరించే జీవనవిధానాన్ని అక్కున చేర్చుకుని నాకే తెలియని
మార్గానికి దిక్సూచివయ్యావు...
ఎలాంటి ఒత్తిళ్లకు లొంగని
మనోధైర్యంతో
నా మతాన్ని నాకంటే బాగా ఆచరిస్తూ నాకే పాఠాలు నేర్పుతున్న నిన్ను చూసి అబ్బురపడకుండా ఎలా ఉండగలను చెప్పు..
మామూలుగా రంజాన్ మాసంలో ఆధ్యాత్మికతను పెద్దగా పాటించని నాకు
నీ ఉపవాస దీక్షలు ఒక అద్భుతంగా కనిపించడంలో తప్పు లేదు కదా...
ఇలా ఉండు అలా ఉండు అని నీపై ఏనాడూ ఆంక్షలు పెట్టని నాకు ఎలా ఉండాలో ఆచరించి చూపుతున్న నీకు
శిరస్సువంచి ప్రణమిల్లడం తప్ప ఎలా కృతజ్ఞతలు చెప్పుకోను మనస్వినీ...