మనసు జాడలు

 

మనసు జాడలు

జయజయ ధ్వానాలు

హాహాకారాలను జయిస్తూ

కొత్త నిశ్శబ్దం నిద్దుర లేచింది...

జిగేల్ మనే కాంతులు

గుండెలు అదిరే పిడుగులను చెరిపేస్తూ

ఎక్కడో ఒక చీకటి కన్నులు తెరిచింది...

మనసును దోచే రాగాలు

మదిని చీల్చే గీతాలను

సవాలు చేస్తూ

ఓ మౌనవీణ తన తీగలను

సవరించింది...

పూదోట పరిమళాలు

తావిలో దాగిన ముళ్లను

కవ్విస్తూ

రాతి పువ్వు ఒకటి మొగ్గ తొడిగింది...

అభిమానాల మందార మాలలు

అవహేళనల ముళ్ల కిరీటాలకు

జడిసిన ఓ మనసు

మరో లోకం వైపు అడుగులు వేసింది

తనజాడలు తానే చెరిపేసుకుంటూ...