పులకింతలు

 పులకింతలు

నీలి నింగి కరిమబ్బు దుప్పటి కప్పుకుని తన నీటి ముత్యాలను నేలపై విసురుతూ కవ్విస్తోంది

అవును సన్నని వాన నేలను ముద్దాడుతోంది

లయబద్దంగా పుడమిని తాకుతున్న వాన నీటి సవ్వడిలో నాకు నీ నవ్వే వినిపిస్తోంది

ఈ వానలో నువ్వు నాతో ఉంటే తడిసిన

మామిడాకులపై జారుతున్న నీటి ముత్యాలను చూస్తూ ఎన్నెన్ని భావాలను అల్లుకునేవాళ్ళం...

వానలో తడుస్తా అని అల్లరి చేసే నువ్వు వద్దని వారించే నేనూ

చల్లని వానలోనూ

ఎంత వెచ్చగా ఉంటాయి ఆ పరిసరాలు..

అదేంటోగానీ

ప్రకృతి పులకింతలోనూ

నాకు నీ తుళ్లింతలే కనిపిస్తాయి

మనస్వినీ..