గుడిలో దేవుడివే నువ్వు..

గుడిలో దేవుడివే నువ్వు..

దగా పడ్డావేమో
అణచివేతకు గురయ్యావేమో
పొలిమేరల ఆవలికి నెట్టివేయబడ్డావేమో
అడవిగుండెల్లో తలదాచుకున్నావేమో
సత్తువచచ్చి పీనుగులా మారావేమో
ఇంకా భయమెందుకు నీకు
జారిపోతున్న ఊపిరిని బిగబట్టు
నీ స్వప్నాన్ని తలచి
కొత్త సత్తువ తెచ్చుకో
పిడికిలి బిగించు
సింహమై గర్జించు
నీ పోరుకు ఎర్రజెండాయే ఎందుకు
నీ ఆకుపచ్చ చొక్కాను
నీ నీలం రంగు కండువాను
కలిపి ముడివేసేయ్
కొత్త జండాను ఎగురవేసేయ్
నీ రక్తం లో తడిస్తే
అది ఎర్ర జెండాయే గుర్తుంచుకో
భయపడి పారిపోకు
పోరాటం మరిచిపోకు
ఎవరు నిన్ను మరిచినా
ఈ చరిత్ర మాత్రం గుండెల్లో దాచుకుంటుంది
చరిత్ర గుడిలో దేవుడివే నువ్వు మిత్రమా..