అక్షయపాత్ర

అక్షయపాత్ర

అంతమే లేని ఆరంభం నా అక్షరం

అక్షయపాత్రను మరిపించే

అమృత కలశం నా భావం

కరిగిపోతాయా నా అక్షరాలు

ఎగిరిపోతాయా నా భావాలు

కనులనుండి జారి

పుడమిని ముద్దాడిన

కన్నీటి చుక్కలో మెరిసేది

నా అక్షరమే

పెదాల మెరుపుల్లో

రంగులు అద్దుకునేదీ

నా అక్షరమే

మనసు పుష్పం వికసించి

విరజిమ్మే సుగంధంలో

పరిమళించేదీ నా భావమే

మనోసంద్రం అల్లకల్లోలంలో

సుడిగుండమై

ఎగసిపడేదీ నా అక్షరమే

ఎలా ఆగుతుంది నా భావం

ఎలా అదిమిపెట్టగలను నా అక్షరాన్ని

ఎలా దాచుకోగలను

నా అంతరంగాన్ని

విరబూసే చిరునవ్వులో

మెరిసే కన్నుల కాంతిలో

రాలిపడే కన్నీటి చుక్కలో

దోబూచులాడే

ఆశా నిరాశల్లో

ఎత్తులు పైఎత్తుల్లో

నక్క జిత్తుల చదరంగంలో

ఓటమి గెలుపుల్లో

ఒంటరి నడకల్లో

చేయూతనిచ్చే స్నేహంలో

మైమరిపించే మనసులో

మండే ఎండలో

చల్లని సమీరంలో

ఇంద్ర ధనుస్సు రంగుల్లో

నీలాల నింగిలో

ఎగిరే పక్షిలో

కోయిల రాగంలో

మనసును తాకే వసంతంలో

నా శ్వాసలో

నా హృదయ స్పందనలో

నా అక్షరం

మారాకులు వేస్తూనే ఉంటుంది

మనస్వినీ