ఎడారి పుష్పం

ఎడారి పుష్పం

మనసు పుస్తకాన్ని తడిమి చూస్తున్నా

ఆప్యాయంగా గుండెకు హత్తుకున్నా

కన్నీటి పర్యంతమవుతున్నాయి భావాలు

చితిమంటలై రగులుతున్నాయి అక్షరాలు

ఎందుకు మాకు హేళనలు

ఎందుకీ రోదనలు

శరపరంపరలుగా దూసుకువస్తున్న

అక్షర ప్రశ్నలకు మౌనంగానే సమాధానమిస్తున్నా

ఎదురుతిరుగుతున్న భావాలను

కాలమనే తడిగుడ్డతో తుడిచేస్తున్నా

ప్రేమపుష్పాలుగా వికసించిన అక్షరాలను

శూన్యంలోకి గిరాటువేస్తున్నా

తులసి వనమో

గంజాయి మొక్కల సమాహారమో తెలియని

మనసు తోటను ఎడారిలా మార్చేస్తున్నా

ఇక మౌనమే నా భాష అని

మనసుకు సర్ది చెప్పుకుంటున్నా