ఆకాశమా క్షమించు

ఆకాశమా క్షమించు

 

నీకు నీకు నీకు

అందరికీ

ప్రతి ఒక్కరికీ

అవును మీ అందరికీ

పేరు పేరునా

మీ అందరికీ

అవును

మీ అందరికీ

తప్పు చేసిన మనసు

మన్ననలు కోరుతోంది

తెలుసుకోండి

మట్టి మనిషిని నేను

మట్టి మనసే నాది

మట్టి మనసు ఆలోచనలు

మట్టి వాసనే వేస్తాయి

భువి నుండి దివికి నిచ్చెనలు వేసినా

నేల వీడి నింగిన విహరించినా

జారిపడేది నేలపైనే

నిజం గ్రహించలేని మనసుదే గ్రహపాటు

నింగిదేముంది పొరపాటు

స్థాయిని తెలియని మనసు

రెక్కలు కట్టుకుంది

ఆకాశవీధిలో ఉరిమే మేఘాలు

దహనం చేస్తాయనీ

రాబందులు పలహారం చేస్తాయనీ

ఊహించలేకపోయింది

నేలను ముద్దాడిన మనసు

తనలోనూ మట్టి ఉందని

ఆలస్యంగా తెలుసుకుంది

పుడమి పంచన చేరిన మనసు

నింగి రాజ్యానికి

శిరస్సు వంచి క్షమాపణలు కోరుతోంది

మనస్వినీ