మనసు లేఖను నువ్వే రాసుకో
మెరిసే నక్షత్రాలను
అక్షరాలుగా మార్చుకోనా
నవ్వే పువ్వులను నా
భావాలుగా మలుచుకోనా
చందమామకు నా మనసు
గోడును చెప్పుకోనా
వెండివెన్నెలలో కలిపి
నా శ్వాసను తెలుపుకోనా
నీలి నింగి మబ్బులతో
నా సందేశం పంపనా
చల్లని చిరుగాలికి నా
మనసు విప్పి చూపనా
ప్రేమలేఖ రాయాలని ఉంది
అక్షరాలను వెతికి పట్టనా
చెదిరిపోయి
పరుగులుతీస్తున్న అక్షరాలకు తలవంచనా
మనసుమాట చెప్పాలని
ఉంది మౌనానికి సవ్వడి నేర్పనా
ఏ భాషలో చెప్పాలో తెలియక
తెలియని పాండిత్యం నేర్చుకోనా
హృదయ సవ్వడి
చెప్పేందుకు మాటలు లేవు నాలో
ప్రేమలేఖ రాసేందుకు
అక్షరాలే లేవు నాలో
నా మనసు పుస్తకం తెరిచిపెడుతున్నా
అక్షరాలను కూర్చి నా మనసు
లేఖను నువ్వే రాసుకో
