ఆ దేవుడి స్వర్గం నాకొద్దు

ఆ దేవుడి స్వర్గం నాకొద్దు

నీతి

నిజాయితీ

ధర్మం

పరోపకారం

పవిత్రత

శాంతం

కారుణ్యం

సహనం

సమానత్వం

ఇవి దైవానికి ఇష్టమైన అంశాలు

అన్నీ చేసిన మంచివాడికి

అంతిమంగా దొరికేది స్వర్గమే

అన్ని మతాలూ ప్రవచించే సూత్రాలే

మరి బతికి ఉన్న మంచోడికి

అడుగడుగునా అవమానాలే

మంచోడివి కాదు

చేతకాని వాడివి

ద్రోహివి

దగాకోరువి

బతకలేనివాడివి

మనసులేని వాడివి

దొరికేవి ఈ బిరుదాలే

మంచోడికి కన్నీళ్ళే ఆస్తులు

రాళ్ళూ రప్పలే రాజమార్గాలు

ప్రతి ఘడియా వేదనమే

ప్రతి మలుపూ నరకమే

కాలే కడుపూ

పేగుల కేకలు

ఎండిన పెదాలూ

ఇంకిన కన్నీళ్ళూ

ఇవే మంచోడి ఆభరణాలు

మరణించాక స్వాగతం పలికే స్వర్గం కోసం

బతికి ఉండీ చావటం ఎందుకు

ప్రశాంతత లేని జీవితం గడిపి

ఉన్నదో లేదో తెలియని స్వర్గం కోసం మరణించాలా

దైవ గ్రంథాల సారం ఇదే అయితే

ఆ దేవుడి స్వర్గం నాకొద్దు

మనస్వినీ