మైలురాయి

మైలురాయి

కన్నులలో వెలుగు రేఖలు లేనే లేవు

తారాడే చీకటిలో నా కలలు మాత్రం

సజీవంగానే ఉన్నాయి

కృశించిన దేహంలో నడిచే సత్తువే లేదు

పరుగులు తీసే కాంక్ష మాత్రం

రగులుతూనే ఉంది

నీలి నింగిని కాన్వాసు చేయలేను

అందమైన బొమ్మలు గీయాలనే తపన మాత్రం

చల్లారనే లేదు

కంటి చూపుతో ఎవరినీ శాసించజాలను

నా కన్నులు మాత్రం

ఇంకా తెరుచుకునే ఉన్నాయి

మనసు భావాలను

పువ్వులుగా పూయించలేను

అంతరంగంలో మాత్రం

పరిమళాలు గుభాళిస్తూనే ఉన్నాయి

సుదూరతీరాల గమ్యాన్ని చేరలేను

జీవనం పయనంలో దాటిన

మైలురాళ్ళు మాత్రం

విరగబడి నవ్వుతూనే ఉన్నాయి

గమ్యాన్ని ముద్దాడకున్నా

తీరాలను దాటకున్నా

ఒక మైలురాయిలా మాత్రం

నిలిచే ఉంటా

మనస్వినీ