Blogger Tips and TricksLatest Tips And TricksBlogger Tricks

Friday, 8 July 2016

జీవనరాగాలు

జీవనరాగాలు 


ఆకాశంలో తారకలను దోసిటపట్టి
నీ కురులలో మల్లెలుగా కూర్చలేను
నీలినింగి జాబిల్లిని
నీ నుదుటన దిద్దలేను
మబ్బుతునకను దోచి తెచ్చి
నీ ఒంటికి చీరగా చుట్టలేను
ఇంద్రధనుస్సు ను చోరీ చేసి
నీకు కానుకగా ఇవ్వలేను
కురిసే చల్లని వెన్నెలను
నీ దేహానికి గంధంగా పూయలేను
మనసున్న మనిషినే నేను
నేల విడిచి సాము చేయలేను
భావకుడనే నేను
భావాలనే పువ్వులుగా
విరిసే పువ్వులనే నవ్వులుగా
అక్షరాలను రాసుకుంటా
నీతో జీవించే జీవితంలో
ప్రతి ఘడియా జీవిస్తా
జీవితాన్నే రాసుకుంటా
అక్షరాలతో విన్యాసాలు చేయను
భావాలతో ప్రయోగాలు చేయను
ఆకాశానికి నిచ్చెనలు వెయ్యను
నీటి మీద రాతలు రాయను
మనసునే కాగితంగా మలుచుకుని
రుధిరాన్నే సిరాగా నింపుకుని
మనసులో ఉన్నదే రాసుకుంటా
నీతో పంచుకునే ఘడియలను భావాలుగా
మధురక్షణాలను అక్షరాలుగా
నవ్వులను మనసు పాటలుగా
కన్నీళ్లను చరణాలుగా
నిత్యం రాసుకుంటా
రాస్తూనే ఉంటా
నా భావాలు నా జీవనరాగాలు  
మనస్వినీ 

No comments:

Post a Comment