మెదడుపై దండయాత్ర

మెదడుపై దండయాత్ర

గాలి కూడా మౌనమైన వేళ

నిశీధిలో నిశబ్ధం రాజ్యమేలుతున్న వేళ

సుతిమెత్తగా

ఎక్కడో మువ్వల సవ్వడి

ఆ రవళి నీ అందియలదేనా

మౌనం దాల్చిన మనసులో సన్నగా రేగుతున్న ప్రకంపనలు నీ పద మంజీరాలేనా...

ఆలోచనలకు స్వస్తి చెబుతూ కనులు భారంగా

మూసుకుపోతున్న ఘడియలో

నా కనురెప్పలపై  వెచ్చగా తగులుతోంది ఏమిటది

నువ్వేనా

అది నీ శ్వాసేనా...

చెవులను తాకుతున్న

ఏదో మంద్రమైన స్వరం నన్ను తట్టి లేపుతోంది

అది నీ తీయని పిలుపేనా...

ఈ ఘడియ నువ్వు నాతో లేవు

అది నాకు తెలుసు

నీకూ తెలుసు

అది నా మనసుకు తెలియనట్టుంది

అందుకే నువ్వు లేకున్నా

ఉన్నట్టే భ్రమిస్తోంది చూడు...

మనసును మొత్తం ఆక్రమించుకున్న నువ్వు

మెదడుపైనా దండయాత్ర చేస్తున్నావా

నేనెక్కడున్నా

నువ్వు నాతోనే ఉన్నట్టు

నమ్మిస్తున్నావుగా

మనస్వినీ...