మంచివాళ్ళంటే భయం నాకు

మంచివాళ్ళంటే భయం నాకు

గుప్పిట మూసి నడవాలిక్కడ

గుప్పిట్లో ఏదో ఉందని నమ్మిస్తూనే ఉండు

ఏమీలేదని తెలిసిందో

మంచితనం ముసుగు

తొలిగిపోవటం ఖాయం

మంచివాళ్ళు నిన్ను వెలివేసేస్తారు...

పంటికింద వేదనను అదిమి

పెదాలపై చిరునవ్వును

పులుముకో

మంచివాళ్లందరూ

నీ చుట్టూనే ఉంటారు...

కడుపులో ఆకలి కేకలు వేస్తున్నా

పదిమందికి అన్నం పెడుతున్నా అని చెప్పుకో

మంచివాళ్ళు నీకు భజన చేస్తారు...

ఉన్నాడో లేడో  తెలియని దేవుడు ఉన్నాడనే నమ్ముకో

కాదని అన్నావో మంచివాళ్ళు నీ తల తీసేస్తారు...

ఏది చేసినా నీ మతం నీ కులం పరిధులను దాటకు

గీత దాటేసావో

ఈ మంచివాళ్ళు నిన్ను వీధిలోకి లాగేస్తారు

ప్రతి అడుగులో మంచితనం నటించు

ప్రతి చర్యలో సంస్కారం చూపించు

అవి నీలో ఎంతమాత్రం లేకున్నా...

ఎందుకంటే ఈ ప్రపంచమంతా

మంచివాళ్ళతో

సంస్కారవంతులతో

నిండి ఉంది...

జీవితాలను శాసిస్తున్న

మంచివాళ్లను చూస్తుంటే

నేనెక్కడ మంచివాడినైపోతానో అని భయమేస్తోంది

మనస్వినీ...