Blogger Tips and TricksLatest Tips And TricksBlogger Tricks

Pages

Thursday 6 August 2015

ఆకలి నా మతం

ఆకలి నా మతం

ప్రవక్తల ప్రవచనములు
నా చెవులకు ఎక్కలేదు
నమాజులో రివాజులు
నాకు అస్సలు తెలియదు
మహాత్ముల బోధనలు
నాకు అర్థం కాలేదు
శిలలా మారి
ఉలకని పలకని
రాముడి చరితం నాకు తెలియదు
దేవుడనే అంటారు
ఆయనకు శిలువ
ఎవరు వేసారో
తెలియనే తెలియదు
గురుబాణీ రాగాలు విన్నా
అంతరార్ధం ఎవరూ చెప్పలేదు
మసీదు ముందు చేతులు
చాచేది నేనే
గుడిమెట్ల ముందు
దీనంగా కనిపించేదీ నేనే
చర్చి గేటు ముందు నేనే
గురుద్వారా వాకిలి నేనే
ఎడారిలా మారిన కనుల చెలమల్లో
ఒక చుక్క కోసం
ఆరాటం నేనే
గుప్పిట మూసి ఇచ్చినా
నిర్లక్ష్యంగా విసిరేసినా
ఆ రూపాయి నాణెంలో
మెరుపును నేనే
తలమీద తాజ్ తో
నాముందు నిలిచినా
నుదుట తిలకంతో
నడుస్తూ వస్తున్నా
ఆ అడుగులే నాకు దైవాలు
మండుతున్న
నా శ్వాసలో
ఎండుతున్న పెదాలలో
ఎడారులైన కనుల మైదానంలో
కరుణ వర్షం కురిపించే
ఆ చేతులే నా జీవ రక్షలు
అవును నేను మనిషినే
ఆకలి నా మతం

1 comment: