నాలోనే ఉన్నావు

నాలోనే ఉన్నావు

మరలా అదే అనుభవం

అదే వింతైన అనుభూతి

నువ్వు లేవని తెలుసు

పక్కనే ఉన్నట్టు అనిపిస్తోంది నాకు

నా చెవుల్లో ఏదో గుసగుసలాడుతున్నావు

ఏదో ముచ్చట చెబుతున్నావు

నువ్వులేకున్నా

నీ వెచ్చని శ్వాస తడుముతోంది నన్ను

నేను మాత్రమే ఉన్న గదిలో

నువ్వూ కలియతిరుగుతున్నావు

నీ మువ్వల సవ్వడి

నీ పరిమళం

నువ్వున్నావనే చెబుతున్నాయి నాకు

ఆరుబయట నవారు మంచంపై కూర్చుని ఉన్నా

అదే మామిడి చెట్టును చూస్తూనే ఉన్నా

ఏవో ఆలోచనల్లో మునిగితేలుతున్నా

అంతలోనే ఏదో అలికిడి

ఏమండీ చాయ్ కావాలా

మరింకేదైనా కావాలా

క్రీగంటి చూపుతో కవ్విస్తున్న

నువ్వే కనిపిస్తున్నావు

ఆవేశాలు రగిలినా

మాటల తూటాలు పేలినా

అనుమానాలు అవమానాలు మొగ్గతొడిగినా

అన్నీ గాలి బుడగలేనని తేల్చివేస్తూ

నీ రూపం నా ముందు మెదలుతూనే ఉంది

ఏ భావమూ లేకపోతే

ఏ బంధమూ విరియకపోతే

నువ్వు లేకున్నా

నా ఎదుట ఎలా ఉన్నావు

మనస్వినీ