చుక్కలా రాలనీ నన్ను

చుక్కలా రాలనీ నన్ను

 

ఒక చుక్కలా రాలనీ నన్ను

చినుకులా కురవనీ నన్ను

ప్రవాహమై సాగనీ నన్ను

ఉబికి వస్తున్న నన్ను బంధీని చెయ్యకు

కురిసే నన్ను ఆపాలని చూడకు

ప్రవహించే నాకు ఆనకట్టలు కట్టకు

సాగిపోనీ నన్ను

వీడిపోనీ నిన్ను

అదిమిపట్టకు నన్ను

జారవిడిచేయ్ నన్ను

నీలోనే జనియించిన నేను

నీ మనసుకు భారమే నేను

గుండెబరువునే నేను

జారిపోయిన స్వప్నానికి ఉనికినే నేను

స్వప్నం ఆనవాళ్ళను

తుడిచేసే తడినే నేను

రాలిపోనీ నన్ను

నీ కనులపొరల గూడును వదిలినా

నీ పాదాలను ముద్దాడే

కన్నీటి చుక్కనే నేను

మనసుతో సంవాదం చేసిన

ఓ కన్నీటి చుక్క

చెక్కిలి చెలమలను దాటి

నా పాదాలకు ప్రణమిల్లింది

మనస్వినీ