సమిధ

సమిధ

అనుభూతుల వెల్లువలో

పునీతమయ్యింది మనసు

ప్రతి ఘడియలో కుసుమాలను

సేకరించుకుంది మనసు

కుసుమాలను అంటిన కొన్ని ముళ్ళు

భావనలను తాకితే

ఏం పాపం చేసింది మనసు

అనుభవపుష్పాల పరిమళాలకు

పులకించింది మనసు

అనుభవాలకు తలవంచిందే గాని

తూలనాడలేదు మనసు

గుచ్చుకున్న ముళ్ళ తాకిడికి

వేదనతో మూలిగింది మనసు

తనను తాను నిలదీసిందేగాని

మరో మనసును గురి చేయలేదు మనసు

అనుభూతుల తోటలో

అనుభవాల సుడిలో

ఒక సమిధగానే మారింది మనసు