Blogger Tips and TricksLatest Tips And TricksBlogger Tricks

Tuesday, 21 June 2016

పాపం పసివాడినే

పాపం పసివాడినే 

తొలకరి భావాలు
పలకరించిన నాటి నుంచి
అన్ని భావాలను పదిలం చేసుకున్నా
ఆలోచనలు అంకురించిన
తొలి ఉదయం నుంచి
అన్ని ఆలోచనలూ
మనసులోనే దాచుకున్నా
ఎవరితోనైనా పంచుకోవాలనీ
మనసు వేదన తగ్గించుకోవాలనీ
అనునిత్యం వేదన పడ్డా
భావాలు పంచుకునే మనసు లేక
మనసు లోతులను తడిమే మనిషిలేక
అల్లకల్లోలమైన నా మనసుతో
తెల్లకాగితంపై అక్షరాలు రాసుకున్నా
వయసు పెరుగుతూనే ఉంది
తరుగుతున్న జీవితంలా
తప్పటడుగుల నాడే
బాధ్యతలు చుట్టుముట్టినా
జీవనం మలుపులు తిరిగినా
మనసులోని పసితనం ఛాయలు పోలేదు
భావావేశ తరంగాలు సద్దుమణగలేదు
ఎవరికి చెప్పుకోవాలి
మనసును ఎవరికి పంచుకోవాలి
మథనం ఆగలేదు
ఉనికేలేని ఓ తోడును వెతుక్కున్నా
కానరాని మనసును నేస్తంగా మలుచుకున్నా
ఊహాలోకంలో నడియాడే సుందరిని
ప్రేయసిగా చూసుకున్నా
ఒక వ్యక్తిగా
ఒక శిఖరంలా నేను నిలిచినా
నా మనసు మాత్రం
కానరాని ఆ సుందరికే
ప్రణమిల్లేది
ఓ పసిపాపగా
పరవశించేది
నా దీక్షకు దేవుడే తలవంచాడేమో
నా మనసు రోదనకు దేవుడి మనసు కరిగిందేమో
ఊహ నిజమయ్యింది
ఊహా సుందరి దిగివచ్చింది
సాంత్వన నాకు స్వంతమయ్యింది
నేడూ అక్షరాలు రాస్తున్నా
నేడూ భావాలు పదిలపరుస్తున్నా
ఇప్పుడు నా అక్షరాలు ఊహలు కాదు
నా భావాలు కల్పితాలు కాదు
మనసు పరిష్వంగంలో జనియించే
పుష్పాలే నా అక్షరాలు
నీ ఒడిలో పసిబిడ్డనై అలరారే నేను
నిత్యం చిన్నారినే
పాపం పసివాడినే కదా
మనస్విని

No comments:

Post a Comment