నీ మెడచుట్టూ గులాబీలు

నీ మెడచుట్టూ గులాబీలు

నిత్యం భావనా సమరం చేసే నేను

ఒకింత మార్పు కోరుకున్నా

స్వగతంలో మార్పును నాటుకుంటూ

నవ్యంగా ఏదో రాసుకోవాలనుకున్నా

మనసూ మమతలకు దూరంగా

ఆవేదనకు రోదనకు

ఎగసిపడే ఆవేశానికి భిన్నంగా

కొత్త భావప్రపంచానికి

అంకురం వేయాలనుకున్నా

బలంగా కళ్ళు మూసుకున్నా

ఒక్కో ఆలోచనకు

ఒక్కో సంకెల వేసుకున్నా

గుండెనిండా గాలి పీల్చుకుంటూ

సరికొత్త భావాలకు శ్రీకారం చుట్టుకున్నా

భారంగా ముద్రలు వేసే అక్షరాలను

దూది పింజాలుగా మలుచుకుని

కొత్త కవిత్వానికి బాటలు వేసుకున్నా

అదేంటో

ఏం జరిగిందో

నా భావనల వరవడిలో

అంతర్లీనంగా నువ్వే కనిపించావు

కీ బోర్డుపై నాట్యం చేసే చేతివేళ్ళకు పోటీ పడుతూ

పరుగులు తీస్తున్న అక్షరాలు

నీ వైపే దూసుకుపోతున్నాయి

అప్రయత్నంగానే నా భావాలు

నీ మెడచుట్టూ గులాబీల్లా అల్లుకుంటున్నాయి

అవును

నా అక్షరాలు

మరో భావానికి ప్రాణం పోయలేమంటూ

తిరుగుబాటు చేస్తున్నాయి

మనస్వినీ